**Apeli Konfirmon Dënimin me 44 Vjet Burgim për Vrasjen në Volljakë të Klinës**
Gjykata e Apelit ka miratuar vendimin e Gjykatës Themelore në Pejë të datës 18 nëntor 2025, sipas të cilit Nderim Gashi, Ardit Gashi, Agron Gashi, Bahri Gashi dhe Basri Gashi u dënuan me një total prej 44 vjet burgim për vrasjen e F.H.
Shqyrtimi i ankesave të palëve u bë më 26 mars 2026, nga një kolegj gjyqtarësh i kryesuar nga Valbona Musliu-Selimaj, me anëtarë Xhevdet Abazi (gjyqtar referues) dhe Kadrije Goga-Lubishtani, raporton “Betimi për Drejtësi”.
Sipas Apelit, gjykata e shkallës së parë ka konstatuar dhe vlerësuar drejt dhe plotësisht të gjitha rrethanat që ndikojnë në llojin dhe lartësinë e dënimit të shqiptuar ndaj të akuzuarve.
Pretendimet e Prokurorisë Themelore në Pejë u gjykuan si të pabazuara, pasi ankesa e saj vetëm përsëriste rrethanat rënduese të theksuara në vendimin e shkallës së parë, pa sjellë elemente të reja që do të ndryshonin dënimin.
Po ashtu, Apeli hodhi poshtë pretendimet e avokatit Fanol Krasniqi, përfaqësues i palës së dëmtuar. Krasniqi kishte argumentuar se të akuzuarit duhej të dënoheshin për vrasje të rëndë në bashkëkryerje dhe se dënimi i dhënë ishte i butë, veçanërisht duke pasur parasysh lirimin e disa prej tyre në fazat e para.
Edhe ankesat e avokatëve mbrojtës të të akuzuarve – Emrush Kastrati, Ruzhdi Gashi, Muhamet Ibraj, Gzim Kollçaku dhe Gani Kelmendi – u konsideruan të pabazuara. Apeli theksoi se mbrojtësit nuk paraqitën asnjë rrethanë lehtësuese shtesë, duke konfirmuar se gjykata e shkallës së parë kishte vlerësuar plotësisht të gjitha rrethanat rënduese në caktimin e dënimit.
Në përfundim, Gjykata e Apelit arriti në përfundimin se dënimi i shqiptuar nga shkalla e parë është i drejtë dhe i ligjshëm, në përputhje me rëndësinë e veprës dhe shkallën e përgjegjësisë penale të të akuzuarve.
Kjo vrasje, e ndodhur më 28 prill 2022 në Volljakë të Klinës, pati rezultuar me dënime të ndryshme në proceset e mëparshme. Në rigjykim, Nderim Gashi mori 28 vjet burgim, ndërsa Basri, Agron, Ardit dhe Bahri Gashi u dënuan me nga 4 vjet secili, duke bërë një total prej 44 vjet burgim. Ndërkohë, në gjykimin e parë, dënimet kishin arritur në 84 vjet burgim në total.
Pas vendimit të Gjykatës Themelore për 44 vjet burgim, “Betimi për Drejtësi” kishte raportuar se vëllai i viktimës F.H., Mahmut Hoxhaj, dyshohet se plagosi dy persona për hakmarrje. Incidenti ndodhi në parkingun ku ai priste viktimat, ku qëlloi në drejtim të tyre para se të arrestohej nga policia. Një nga të plagosurit ishte Basri Gashi, i cili ishte liruar nga paraburgimi më 17 tetor, pas shpalljes së aktgjykimit. Personi tjetër i plagosur ishte A.U., i cili kishte shkuar për të marrë Gashin dhe të tjerët.
Aktakuza e Prokurorisë Themelore në Pejë, e ndryshuar më 3 shkurt 2023, ngarkonte gjithsej gjashtë të akuzuar: Nderim Gashi, Basri Gashi, Agron Gashi, Ardit Gashi, Bahri Gashi dhe Ylli Gashi, me akuza për “Vrasje të rëndë”, “Vrasje të rëndë në tentativë”, “Armëmbajtje pa leje” dhe ndihmë në kryerjen e veprës penale “Vrasje e rëndë”.
Sipas aktakuzës, më 28 prill 2022, rreth orës 20:30, në parkingun e restorantit “Villa Park” në fshatin Volljakë të Klinës, Nderim, Basri, Agron, Ardit dhe Bahri Gashi, të përgatitur paraprakisht dhe duke vepruar në bashkëkryerje, privuan nga jeta F.H. me qëllim hakmarrjeje, duke rrezikuar edhe jetën e personave të tjerë. Ylli Gashi akuzohej se ndihmoi në vrasje duke siguruar armën për Nderim Gashin.
(Burimi: Betimi për Drejtësi)