Raphinha rikthehet në Barcelonë, ende një muaj larg fushave
Sulmuesi brazilian Raphinha (29 vjeç) është rikthyer në Barcelonë, pasi ka kaluar disa ditë në Brazil me familjen pas lëndimit të pësuar. Ai kishte marrë leje nga klubi për t’u rikuperuar pranë familjes.
Lëndimi, një dëmtim në bicepsin femoral të këmbës së djathtë, ndodhi gjatë ndeshjes miqësore ndaj Francës (1-2).
Sipas parashikimeve mjekësore, siç raporton “Mundo Deportivo”, ai pritet të qëndrojë jashtë fushave për rreth pesë javë. Kjo do të thotë se i mbetet edhe rreth një muaj rikuperim intensiv para se të jetë plotësisht në dispozicion të ekipit.
Pas mbërritjes në terminalin e fluturimeve private, Raphinha është drejtuar menjëherë drejt qendrës stërvitore për të vazhduar trajtimin nën mbikëqyrjen e stafit mjekësor të klubit katalanas.
Objektivi kryesor i Barcelonës është që lojtari të jetë plotësisht i gatshëm për “El Clasico” kundër Real Madridit. Kjo ndeshje vendimtare, e cila mund të jetë kyçe për titullin e La Ligës, do të zhvillohet më 10 maj në “Spotify Camp Nou”.
Mungesa e Raphinhas, i cili është një figurë kyçe në skuadër, konsiderohet e rëndësishme në këtë fazë vendimtare të sezonit. Rikthimi i tij pritet të sjellë sërish energji dhe frymë udhëheqëse për ekipin në ndeshjet e ardhshme.