Besa Shahini, asambleiste në Kuvendin Komunal të Prishtinës dhe bashkëshortja e Dardan Molliqajt, është bërë nënë. Ajo ka vlerësuar lart kujdesin e ofruar në Qendrën Klinike Universitare të Kosovës (QKUK).
Në postimin e saj të parë publik me bebin, Shahini sqaroi edhe arsyen e tërheqjes së saj nga angazhimet publike gjatë javëve të fundit. Ajo shprehu mirënjohje për urimet dhe njoftoi se fëmija kishte lindur tri javë më parë në QKUK. Kjo ishte arsyeja pse ajo nuk kishte mundur të merrte pjesë në diskutimet e rëndësishme, duke përfshirë aktgjykimin e Hagës, testin PISA dhe rregulloren për tarifat e hyrjes në qendër të Prishtinës, e cila ishte në votim në Kuvendin Komunal. Shahini theksoi se do të marrë edhe disa javë kohë pushim para se të rifillojë angazhimin e saj.
“Një gjë dua ta theksoj që sot: kujdesi në QKUK ka qenë shumë i mirë. Falënderoj mjekët, por sidomos infermierët, të cilët ndihmuan në lindje dhe u përkujdesën për ne pas lindjes,” shkroi ajo.
Shahini ngriti shqetësimin se infermierët punojnë me paga të ulëta dhe me mbingarkesë të madhe, pasi numri i personelit nuk mjafton për numrin e pacientëve dhe shërbimet që ofron QKUK. Ajo theksoi se të dhënat e Agjencisë së Statistikave tregojnë se në sistemin publik shëndetësor të Kosovës punojnë mbi 7,700 infermierë, duke rezultuar në një raport prej vetëm 5 infermierësh për 1,000 banorë. Në krahasim me vendet e zhvilluara, si Gjermania dhe Danimarka, të cilat në vitet 2020-2022 kishin mbi 12 infermierë për 1,000 banorë, dhe Norvegjia me mbi 16, shifrat e Kosovës janë më afër atyre të vendeve në zhvillim.
Sipas projektit Converge2EU, Kosovës i duhen 41 vite për të arritur mesataren e Bashkimit Evropian (BE) sa i përket numrit të infermierëve, ndërsa për numrin e shtretërve spitalorë për kokë banori, do t’i duhen mbi 100 vjet.
Besa Shahini përfundoi duke theksuar se Kosova nuk është imune ndaj presionit demografik dhe ka nevojë për investime thelbësore në shërbimin shëndetësor përballë një popullate në plakje. “Kjo situatë përbën një emergjencë kombëtare që qeveria duhet ta trajtojë me urgjencë,” theksoi ajo në njoftimin e saj.