Numri i viktimave nga epidemia e Ebolës në Republikën Demokratike të Kongos ka kaluar shifrën 500. Organizata Botërore e Shëndetësisë (OBSH) e cilëson situatën në rajon si shqetësuese, bazuar në të dhënat e fundit të autoriteteve shëndetësore vendase.
Sipas raportit të OBSH-së të datës 4 korrik, në RD të Kongos janë regjistruar 506 viktima dhe 1,561 raste të konfirmuara të infeksionit.
Në Ugandën fqinje, janë raportuar 20 raste të konfirmuara dhe vetëm dy viktima, gjë që tregon një përhapje më të kufizuar të sëmundjes në këtë shtet.
Autoritetet shëndetësore kanë njoftuar se epidemia aktuale në RD të Kongos u shpall zyrtarisht më 15 maj dhe është shpërthimi i 17-të i Ebolës në vend. Sipas OBSH-së, ajo është shkaktuar nga varianti Bundibugyo, për të cilin aktualisht nuk ekziston as vaksinë, as trajtim specifik.
Ebola është një sëmundje virale e rrezikshme që shkakton ethe hemorragjike dhe ka marrë jetën e mbi 15,000 personave në Afrikë gjatë pesë dekadave të fundit. Shpërthimi më i rëndë në RD të Kongos mbetet ai i viteve 2018–2020, kur u regjistruan rreth 3,500 raste dhe afro 2,300 viktima.