FIFA dhe Pierluigi Collina reagojnë ndaj akuzave të Trumpit për arbitrin e Botërorit
FIFA dhe Pierluigi Collina, kryetari i Komisionit të Arbitrave të FIFA-s, i janë përgjigjur ish-presidentit amerikan Donald Trump, pasi ky i fundit e quajti “të dyshimtë” njërin prej arbitrave të Kupës së Botës. Debati u ndez pas polemikave për kartonin e kuq të Folarin Balogun-it.
Kreu i Komisionit të Arbitrave në FIFA reagoi publikisht pas deklaratave kritike të Trumpit ndaj arbitrit Raphael Claus, i cili përjashtoi Balogun-in në ndeshjen mes SHBA-së dhe Bosnjë-Hercegovinës.
Balogun u ndëshkua me karton të kuq pas një ndërhyrjeje ndaj Tarik Muharemoviçit, pas sinjalizimit nga VAR-i. Megjithatë, vendimi ngjalli debate të shumta, veçanërisht pasi FIFA më vonë vendosi të pezullojë dënimin automatik prej një ndeshjeje, duke i mundësuar sulmuesit amerikan të luante në përballjen e 1/8 së finales kundër Belgjikës.
Trump, i cili raportohet se luajti një rol aktiv në kërkesën për rishikim të rastit, kritikoi ashpër vendimin fillestar të arbitrit Claus.
“Nuk ishte faull,” deklaroi Trump. “Ishin dy lojtarë që po vraponin me shpejtësi të plotë dhe thjesht u përplasën me njëri-tjetrin. Nuk mund ta vendosësh këmbën saktësisht në këmbën e tjetrit në atë situatë. Ishin dy atletë të mëdhenj që u ngatërruan me njëri-tjetrin.”
Ish-presidenti amerikan shkoi edhe më tej, duke e quajtur arbitrin “pak të dyshimtë.”
“Ky arbitër është paksa i dyshimtë. Nëse e kontrolloni të shkuarën e tij… nuk dua ta them këtë, sepse nuk më pëlqen të krijoj polemika, por është shumë i dyshimtë,” theksoi Trump.
Komentet e tij nxitën reagimin e FIFA-s, ku Pierluigi Collina mbrojti publikisht Raphael Claus-in.
Si kryetar aktual i Komisionit të Arbitrave të FIFA-s, ish-arbitri i famshëm italian publikoi një deklaratë ku e përshkruante Claus-in si një arbitër të nivelit më të lartë ndërkombëtar dhe një pjesë thelbësore të ekipit të arbitrave të Botërorit.
“FIFA e njeh Raphael Claus-in si një nga arbitrat profesionistë më të mirë në botë dhe si një anëtar të vlerësuar të ekipit të arbitrave në Kupën e Botës. Gjatë gjithë karrierës së tij, ai ka treguar vazhdimisht standardet më të larta të profesionalizmit dhe integritetit,” thuhej në deklaratë.
“Raphael Claus arbitron në Kupën e dytë të Botës, pasi ishte me ne edhe në Katar në vitin 2022. Ai është një arbitër me përvojë dhe shumë i respektuar, dhe ne vazhdojmë të kemi besim të plotë tek ai si një zyrtar i besueshëm i ndeshjeve,” vijonte reagimi i FIFA-s.
Collina ka qenë mjaft aktiv gjatë këtij Botërori, duke trajtuar disa çështje të ndjeshme që lidhen me arbitrimin. Ai ka pasur ndikim edhe në ndryshimin e rregullave për të parandaluar simulimet e dëmtimeve dhe vonesat e qëllimshme në lojë.
Edhe pse Collina i ka vlerësuar pozitivisht këto ndryshime dhe efektin e tyre deri më tani në turne, disa vendime të arbitrave kanë vazhduar të ngjallin debate. Një prej rasteve më të diskutuara ishte ai kur një lojtar i Argjentinës nuk u largua nga fusha për shkak të një boshllëku të vogël në interpretimin e rregullores, gjë që ngjalli zemërim te tifozët.
Po ashtu, disa paraqitje të arbitrave kanë tërhequr vëmendjen e shikuesve të Botërorit, përfshirë ndeshjen mes Paraguait dhe Francës, ku ish-portieri dhe analisti i BBC-së, Joe Hart, theksoi disa raste që, sipas tij, duhej të ndëshkoheshin me karton të kuq.
Për SHBA-në dhe Donald Trumpin, megjithatë, pezullimi i dënimit të Balogun-it nuk solli rezultatin e dëshiruar. Sulmuesi ishte në dispozicion për ndeshjen ndaj Belgjikës, por amerikanët u eliminuan pas humbjes 4-1, duke i dhënë fund një fushate të respektueshme, por që u mbyll me një zhgënjim të madh.