**Ngjarje Tragjike në Greqi: Tre të Rinj, Mes tyre një Shqiptar, Dyshohen se Droguan deri në Vdekje një 19-vjeçare**
Një ngjarje tragjike është regjistruar në Kefalonia, Greqi. Tre të rinj, njëri prej të cilëve me origjinë shqiptare, dyshohen se kanë droguar një 19-vjeçare deri në mbidozë, duke i shkaktuar vdekjen nga një atak kardiak.
Tre autorët janë arrestuar nga policia dhe akuzohen për vrasje pa dashje. Hetimet paraprake sugjerojnë se të rinjtë ishin akomoduar në një hotel në Kefalonia, ku në dhomë kanë konsumuar edhe lëndë narkotike.
Pamjet e kamerave të sigurisë kanë fiksuar të rinjtë duke dalë nga hoteli, ku duket qartë se viktima ishte në gjendje të rëndë shëndetësore. Më pas, tre të rinjtë e braktisën vajzën në një shesh publik, duke njoftuar një shoqe të saj për vendndodhjen.
Në përpjekje për të fshehur provat, ata pastruan dhomën dhe fshehën celularin e viktimës, e cila, pak kohë pas braktisjes në shesh, humbi jetën si pasojë e arrestit kardiak. Çështja i është referuar prokurorisë, dhe pritet që në ditët në vijim tre autorët të njihen me akuzat zyrtare.