Kryetari i Partisë Demokratike të Kosovës (PDK), Bedri Hamza, ka pritur në takim udhëheqësit e Organizatës së Veteranëve të Luftës së Ushtrisë Çlirimtare të Kosovës (OVL-UÇK). Gjatë takimit, u diskutuan sfidat aktuale me të cilat po përballet vendi.
Hamza theksoi rëndësinë thelbësore të ruajtjes së dinjitetit, së vërtetës për luftën çlirimtare dhe vlerave për të cilat u sakrifikuan breza të tërë. Ai shtoi se veteranët e UÇK-së mbartin mbi supe një pjesë të pazëvendësueshme të historisë së Kosovës, duke qëndruar fort në ditët më të vështira dhe duke dhënë gjithçka për lirinë.
Në vazhdën e kësaj teme, Hamza bëri thirrje për pjesëmarrje masive në protestën e paralajmëruar për më 1 tetor, organizuar në mbështetje të ish-krerëve të UÇK-së, të cilët janë dënuar nga Gjykata Speciale.
Protesta do të mbahet në orën 16:00, në sheshin “Skënderbeu” në Prishtinë. Kreu i PDK-së ftoi veteranët, studentët dhe të gjithë qytetarët që të bashkohen, me moton: “Të gjithë bashkë kundër padrejtësisë!”