Deputeti i Partisë Demokratike të Kosovës (PDK), Enver Hoxhaj, ka kritikuar ashpër qëndrimin e evropianëve lidhur me Ligjin për Gjykatën Speciale. Ai ka kundërshtuar fuqishëm pretendimet e tyre të përsëritura se Kosova po përpiqet t’i shmanget drejtësisë.
“Evropianët janë bërë të bezdisshëm dhe të padurueshëm me insistimin e tyre se ne gjoja po i shmangemi drejtësisë,” ka deklaruar Hoxhaj. “Askush nuk është i interesuar t’i shmanget drejtësisë. Kosova i ka besuar drejtësisë dhe Perëndimit. Jam i habitur nga sjellja histerike e evropianëve.”
Ish-ministri i jashtëm theksoi se një ligj i tillë është i domosdoshëm edhe për angazhimin diplomatik dhe lobimin në Washington, duke e cilësuar atë si një pozicionim të rëndësishëm politik dhe kombëtar për Kosovën.
“Na nevojitet një ligj i tillë, sepse ne si politikanë, kur të shkojmë në Washington për të lobuar, nuk mund të flasim për vendimin e gjykatës, pasi nuk pranohet të diskutohet rreth tij,” shpjegoi Hoxhaj. “Por, duke folur për ligjin, ne mund të lobojmë. Ky ligj është një pozicionim politik dhe kombëtar i Kosovës.”
Hoxhaj bëri të ditur se do të ketë takime me evropianët, por qartësoi se dëgjimi i qëndrimeve të tyre nuk nënkupton detyrimisht marrjen e tyre në konsideratë.
“Do të kemi takime me evropianët, do t’i dëgjojmë, por kjo nuk do të thotë që do t’i marrim parasysh,” u shpreh ai në ATV. “Evropianët duhet të jenë të qartë për një gjë: ne duhet ta mbrojmë lirinë, pavarësinë dhe historinë tonë. Nëse gjykata ka për qëllim të krijojë balanca gjeopolitike rajonale, duke synuar që, pas 30 vjetësh nga shpërbërja e Jugosllavisë, të gjithë të konsiderohemi fajtorë, ne nuk e pranojmë një gjë të tillë. E di që Evropa është djepi i demokracisë dhe i sundimit të ligjit, por, si dikush i shkolluar në Perëndim, e di gjithashtu se Evropa është edhe djepi i intrigës.”
