Irani ka deklaruar se është i gatshëm t’u përgjigjet kërcënimeve të Shteteve të Bashkuara të Amerikës në lidhje me situatën në Ngushticën strategjike të Hormuzit.
Ky reagim nga Teherani vjen pas njoftimit të presidentit Donald Trump, sipas të cilit ushtria amerikane do të nisë shoqërimin e anijeve në Ngushticën e Hormuzit duke filluar nga mëngjesi i së hënës, sipas kohës së Lindjes së Mesme.
Ministria e Jashtme iraniane përsëriti gatishmërinë e saj për t’u përgjigjur ndaj kërcënimeve të SHBA-së në këtë zonë kyçe.
Në një deklaratë të shpërndarë nga agjencia gjysmëzyrtare Mehr, zëdhënësi Esmail Baghaie theksoi se Irani mbetet “rojtar dhe mbrojtës” i Ngushticës së Hormuzit. Ai shtoi se “anijet dhe kompanitë e transportit detar e dinë mirë se garantimi i sigurisë së tyre kërkon koordinim me autoritetet përkatëse të Republikës Islamike të Iranit,” raporton BBC.
Baghaie nënvizoi gjithashtu se shtetet që respektojnë ligjin nuk kanë asnjë arsye për të ndjekur “veprime të paligjshme” të Shteteve të Bashkuara.
Ndërkohë, më herët kreu i komandës qendrore iraniane kishte paralajmëruar se “çdo forcë e armatosur e huaj” që tenton të afrohet ose të hyjë në këtë ngushticë, “sidomos ushtria amerikane,” do të sulmohet.