Kryeministri Kurti: Deficiti Tregtar, Sfidë Kryesore e Ekonomisë
**PRISHTINË** – Kryeministri i Kosovës, Albin Kurti, ka theksuar se deficiti tregtar mbetet një nga sfidat kryesore me të cilat përballet ekonomia e vendit. Këto komente Kurti i bëri gjatë ceremonisë së nënshkrimit të marrëveshjes së bashkëpunimit për zhvillimin e Eko-Parqeve Industriale në Kosovë, raporton Ekonomia Online.
“Përkundër rritjes ekonomike që kemi shënuar, na duhet të pranojmë se deficiti tregtar mbetet një nga sfidat kryesore të ekonomisë sonë. Gjatë vitit 2023 (ose vitit të kaluar), Kosova importoi mallra në vlerë prej rreth shtatë miliardë eurosh, ndërsa eksportoi rreth një miliardë euro. Edhe në vitin 2024, pavarësisht rritjes së eksportit, hendeku tregtar po vazhdon të jetë i madh,” deklaroi ai.
Sipas Kurtit, shtylla e parë e programit qeverisës i kushtohet ekonomisë qarkore dhe asaj konkurruese.
“Shtylla e parë e programit tonë qeverisës i kushtohet ekonomisë qarkore dhe konkurruese. Prandaj, nisja e projektit për zhvillimin e parqeve eko-industriale është në linjë të plotë me orientimin tonë strategjik dhe lidhet drejtpërdrejt me mënyrën se si do të zhvillohet industria dhe ekonomia e Republikës sonë në vitet në vijim,” theksoi Kurti.
Kryeministri shtoi se gjatë viteve të fundit, ekonomia e Kosovës ka shënuar rritje të ndjeshme. Ai shprehu dëshirën që sa më shumë mallra që aktualisht blihen nga jashtë, të prodhohen brenda Kosovës.
“Gjatë viteve të fundit, ekonomia e Kosovës ka shënuar rritje të ndjeshme. Bruto Produkti Vendor është rritur mesatarisht me nga një miliardë euro në vit, ndërkohë që më herët nevojiteshin tre vjet për një rritje të tillë. Në të njëjtën periudhë, gjatë këtyre pesë viteve të fundit, mbi 85 mijë vende të reja pune janë krijuar. Eksportet e shërbimeve janë gati trefishuar, ndërkaq investimet e huaja direkte kanë kaluar për herë të parë vlerën prej një miliardë eurosh. Ne duam që sa më shumë mallra që sot i blejmë nga jashtë të prodhohen në Kosovë. Prandaj, parqet industriale i shohim si një nga mekanizmat që mund të ndihmojnë në arritjen e këtij qëllimi. Ato u ofrojnë bizneseve vendase hapësirën dhe infrastrukturën e nevojshme për t’i zgjeruar kapacitetet prodhuese, si dhe krijojnë kushte më tërheqëse për investitorët e huaj që dëshirojnë të zhvendosin një pjesë të veprimtarisë së tyre prodhuese në vendin tonë,” përfundoi Kurti.