Ish-futbollisti serb Uroš Milošević, 31 vjeç, është arrestuar në Portugali nën dyshimin se ishte pjesë e një karteli ballkanik të trafikut të kokainës.
Milošević u arrestua më 12 gusht, në autostradën A6 pranë Estremozit, ndërsa ishte duke drejtuar një furgon. Brenda automjetit autoritetet portugeze zbuluan rreth 1.5 ton kokainë, si dhe dy armë të mbushura dhe të gatshme për përdorim.
Sipas raportimeve të mediave portugeze dhe spanjolle, vlera e kokainës së sekuestruar vlerësohet në rreth 70 milionë euro.
Në të njëjtin operacion janë arrestuar edhe dy shtetas të tjerë serbë, ndërsa të tre dyshohet se kanë pasur lidhje me një organizatë të fuqishme kriminale ballkanike që vepron në trafikun e kokainës në Gadishullin Iberik.
Sipas hetimeve, droga mbërrinte në Portugali me anije, ku më pas merrej, paketohej dhe ngarkohej në furgonë e kamionë për t’u transportuar drejt Spanjës.
Milošević dyshohet se kishte rolin e korrierit tokësor, me detyrë që kokainën ta transportonte nga Portugalia drejt Spanjës përmes autostradës A6. Më pas, droga dyshohet se do të shpërndahej në vende të ndryshme të Evropës.
Në kuadër të të njëjtit operacion, në Spanjë janë arrestuar edhe dy persona të tjerë me shtetësi serbe, ndërsa autoritetet kanë sekuestruar gjithsej 3.7 ton kokainë.
Operacioni është zhvilluar në bashkëpunim mes policisë portugeze dhe asaj spanjolle dhe është cilësuar si një goditje e rëndë ndaj rrjetit kriminal.
Uroš Milošević ka qenë futbollist profesionist në Serbi dhe gjatë karrierës së tij ka luajtur për disa klube, përfshirë Čukarički, IM Rakovica, Teleoptik dhe Sinđelić Beograd.
Ai e ka përfunduar karrierën futbollistike në vitin 2022.
Tashmë, ish-futbollisti ndodhet në paraburgim në Portugali, ndërsa hetimet për rolin e tij të dyshuar në trafikun ndërkombëtar të kokainës janë duke vazhduar.
Milošević dyshohet për përfshirje në këtë rrjet kriminal, ndërsa përgjegjësia e tij penale do të përcaktohet nga procedurat gjyqësore.