Ish-kryetari i Manchester Cityt, David Bernstein, ka paralajmëruar se klubi mund të përballet me sanksione “drastike” nëse konfirmohen raportimet se është shpallur fajtor për 114 nga 115 akuzat për shkelje të rregullave financiare të Premierligës.
Megjithatë, Premierliga ende nuk ka bërë njoftim zyrtar për përfundimin e çështjes dhe nuk është bërë e ditur asnjë dënim i mundshëm. Manchester City vazhdon t’i mohojë akuzat dhe pritet të apelojë nëse ato konfirmohen.
Bernstein, i cili ishte kryetar i Cityt nga viti 1998 deri më 2003, tha se një gjobë financiare mund të mos jetë e mjaftueshme në rast të një vendimi përfundimtar kundër klubit.
“Nëse pas apelit shpallen fajtorë, klubi im i dashur do të përballet me një dënim shumë të rëndë. Paratë nuk janë të mjaftueshme, do të duhej të ishte diçka, fatkeqësisht, më drastike”, deklaroi Bernstein.
City u akuzua në vitin 2023 për 115 shkelje të pretenduara, që lidhen me periudhën 2009–2018. Akuzat përfshijnë mosdhënien e informacioneve të sakta financiare, pagesat ndaj lojtarëve dhe trajnerëve, shkelje të rregullave të qëndrueshmërisë financiare, si dhe mosbashkëpunim me hetimin.
Nëse raportimet për një vendim fajësues konfirmohen pas procesit të apelimit, ndër masat që janë përmendur si mundësi janë zbritje e madhe pikësh dhe, në skenarin më ekstrem, përjashtimi nga Premierliga. Megjithatë, asnjëra prej këtyre masave nuk është konfirmuar zyrtarisht.
Ndërkohë, ish-ylli i Oasis dhe tifoz i Cityt, Noel Gallagher, ka thënë se lajmet kanë qenë “tronditëse” për të, ndërsa sekretarja britanike e Kulturës, Lisa Nandy, e ka cilësuar çështjen si shqetësuese për tifozët dhe ka kërkuar një zgjidhje të shpejtë.
Manchester City e ka mohuar vazhdimisht çdo shkelje dhe ka theksuar se do të përdorë të drejtën e apelimit nëse akuzat konfirmohen.