Hansi Flick i zhgënjyer pas El Clasicos: “Nuk ishte e lehtë!”
Trajneri i Barcelonës, Hansi Flick, ka shprehur zhgënjimin e tij pas humbjes 2-1 nga Real Madridi, në El Clasicon e javës së 10-të të La Ligës.
Pas përfundimit të ndeshjes, tekniku gjerman pranoi se skuadra e tij nuk ishte në gjendje optimale fizike, por theksoi se kjo nuk duhet të shërbejë si justifikim për rezultatin negativ.
“Jam i zhgënjyer,” deklaroi Flick. “Nuk ishte një ndeshje e lehtë, ata bënë një paraqitje shumë të mirë, por edhe ne patëm raste për të shënuar golin e dytë.”
Ai shtoi se lodhja e lojtarëve, si pasojë e udhëtimeve dhe ndeshjeve me kombëtaret, është pjesë e pashmangshme e futbollit dhe se skuadra duhet të mësohet të përballet me këto sfida.
“Nuk pranoj justifikime,” theksoi ai. “Sot nuk ishim të freskët, por kjo është diçka me të cilën duhet të përballemi. Udhëtimet dhe ndeshjet ndërkombëtare janë pjesë e lojës. Tani duhet të përqendrohemi te ndeshjet e ardhshme.”
Në fund, trajneri gjerman theksoi rëndësinë e analizimit të gabimeve dhe identifikimit të fushave për përmirësim. “Varet nga ne të reflektojmë se çfarë mund të bëjmë më mirë, çfarë duhet të përmirësojmë dhe çfarë duhet të bëjmë,” përfundoi Flick.