**NBA kërkon kampionat të përbashkët në Evropë, EuroLeague refuzon ofertën e parë: “Ofensivë dhe Kolonialiste”**
NBA po përgatitet të shtrijë ndikimin e saj në Evropë. Por nuk bëhet fjalë vetëm për basketboll; gara e vërtetë është kryesisht ekonomike, duke përfshirë të drejtat e transmetimit, fondet e investimeve, arenat ku do të zhvillohen ndeshjet, si dhe tërheqjen e brezave të rinj të tifozëve.
Komisioneri i NBA-së, Adam Silver, ka caktuar si objektiv tetorin e vitit 2027. Megjithatë, përpara kësaj date, duhet qartësuar nëse NBA mund të arrijë një marrëveshje me EuroLeague për të garuar me skuadra basketbolli, audiencë dhe të ardhura të përbashkëta. Shenjat e para nuk janë inkurajuese, pasi evropianët refuzuan propozimin e parë të projektit amerikan më 6 tetor.
Në Cernobbio, në liqenin e Komos, 13 klubet aksionere të EuroLeague hodhën poshtë propozimin e NBA-së për të krijuar së bashku kompeticionin e ri. Disa prej të pranishmëve në takim thuhet se e përshkruan ofertën si “fyese” apo edhe “kolonialiste”. Pika kryesore e mosmarrëveshjes ishte shuma e parave e vënë në diskutim: një pagesë fillestare shumë më e vogël se 1 miliard euro, që do të ndahej mes 13 skuadrave, e ndjekur nga një sistem bonusesh që klubet evropiane e vlerësonin si shumë të vështirë për t’u realizuar, shkruan ‘la Repubblica’.
Në takimin e organizuar nga Olimpia Milano, morën pjesë të gjitha klubet me të drejtë vote në Euroleague Commercial Assets (ECA), kompania që administron asetet komerciale të kompeticionit. Këtu përfshiheshin Real Madridi, Barcelona, Olimpia Milano, Panathinaikosi, Olympiacos, Maccabi Tel Aviv, Žalgiris, Fenerbahçe, Anadolu Efes dhe Bayern Munich, si dhe ekipi drejtues i udhëhequr nga CEO Chus Bueno.
Refuzimi fillestar nuk do të thotë se negociatat kanë përfunduar. Aspak. Bisedimet janë ende në vazhdim. Plani paraprak për NBA Europe parashikon 16 skuadra, 12 anëtarë të përhershëm dhe katër skuadra që vijnë nga fazat kualifikuese.
Komisioneri i NBA-së, Silver, ka bërë të qartë se nuk ka ndërmend të presë pafundësisht. “Kjo është një mundësi e vetme në jetë. Është një projekt historik për sportin evropian.”
Ai gjithashtu konfirmoi se negociatat po vazhdojnë: “Po shënojmë progres në bisedimet tona me EuroLigën. Do të ishte në interesin e të gjithëve të arrijmë një marrëveshje.”
NBA është e gatshme të sjellë modelin e saj amerikan në Evropë: të drejta transmetimi ndërkombëtare dhe arena të dizajnuara për të gjeneruar të ardhura edhe kur nuk zhvillohen ndeshje, përmes shërbimeve të mikpritjes, restoranteve, dyqaneve, eventeve dhe koncerteve.
Kontrolli i kostove do të ishte thelbësor. NBA e lidh tavanin e pagave me të ardhurat dhe aplikon një taksë luksi mbi pragje të caktuara. Në të kundërt, EuroLeague tradicionalisht u ka ofruar aksionerëve të saj liri më të madhe investimi.
Nëse vendos të veprojë vetëm dhe të refuzojë një partneritet me amerikanët, EuroLiga tashmë po planifikon zgjerimin nga 20 në 24 skuadra, me licenca më të qëndrueshme dhe të ardhura më të parashikueshme. Një model gjithnjë e më i ngjashëm me atë të një lige të mbyllur.