**Dara i dhuron Bullgarisë trofeun e parë në Eurovision me këngën “Bangaranga”**
Këngëtarja bullgare Dara ka fituar edicionin e vitit 2026 të “Eurovision Song Contest”. Me këngën “Bangaranga”, ajo triumfoi në Vjenë, duke i sjellë Bullgarisë fitoren e parë në historinë e këtij kompeticioni. Ky sukses tejkaloi të gjitha parashikimet.
Dara, emri i plotë i së cilës është Darina Nikolaeva Jotova, ka lindur në Varna më 9 shtator 1998. Ajo konsiderohet një nga këngëtaret më të njohura pop në Bullgari. Fama e saj nisi në vitin 2015, pas pjesëmarrjes në versionin bullgar të “X Factor”, ku arriti në finale dhe u rendit e treta.
Me një prani skenike tërheqëse dhe stil muzikor origjinal e të larmishëm, Dara ka kryesuar shpesh klasifikimet muzikore. Ndër këngët e saj më të njohura janë “Thunder”, e publikuar në vitin 2021 dhe që qëndroi në krye të listave për njëmbëdhjetë javë rresht, si dhe “Call Me” dhe “Mr. Rover”. Në vitin 2022, ajo nxori albumin e saj të parë, “Rodena takava”, i cili u shndërrua në albumin më të shitur të vitit nga një artiste femër. Dara ka arritur të numërojë mbi 80 milionë dëgjime dhe shikime në YouTube. Nga viti 2021, ajo shërben edhe si trajnere në “The Voice of Bulgaria”. Albumi i saj i dytë, “Adhdara”, u publikua në vitin 2025. Në fillim të vitit 2026, pas fitores në përzgjedhjen kombëtare “Natsionalnata selektsiya”, Dara fitoi të drejtën për të përfaqësuar Bullgarinë në Eurovision, ku më pas triumfoi.
Si një kuriozitet, regjia skenike e performancës së “Bangaranga” u drejtua nga Fredrik Rydman. Ky i fundit ka një histori të suksesshme në Eurovision, pasi ka realizuar regjinë skenike për dy fitues të tjerë të mëparshëm: suedezin Måns Zelmerlöë me “Heroes” në 2015 dhe zviceranin Nemo me “The Code” në 2024. Gjithashtu, në vitin 2023, Rydman bashkëpunoi me Käärijä, i cili zuri vendin e dytë me këngën “Cha Cha Cha”.