Gjykata Kushtetuese refuzon kërkesën e Erion Veliajt kundër dërgimit në gjyq nga SPAK
Gjykata Kushtetuese ka refuzuar kërkesën e kryebashkiakut të Tiranës, Erion Veliaj, për të kundërshtuar vendimin e dërgimit të tij në gjyq nga Prokuroria e Posaçme (SPAK). Kushtetuesja nuk pranoi të shqyrtojë në seancë plenare ankimimin e Veliajt kundër vendimmarrjes së një gjyqtari paraprak, i cili e ka dërguar atë si të pandehur përballë SPAK në gjykimin e themelit.
Veliaj pretendonte papajtueshmëri me Kushtetutën dhe kërkonte shfuqizimin e vendimit të datës 9 shkurt 2026 të gjyqtares paraprake. Ky vendim kishte miratuar hetimet e SPAK dhe kishte vendosur vazhdimin e gjykimit të hapur ndaj 30 personave të akuzuar, përfshirë edhe funksionarin lokal. Gjyqtarët kushtetues vlerësuan se çështja nuk plotësonte kushtet për t’u kaluar në seancë plenare.
Siç raporton gazetarja Anila Hoxha e Top Channel, kryebashkiaku kishte kërkuar gjithashtu në këtë gjykatë pavlefshmërinë e çdo seance të mëpasshme, që nga momenti kur gjyqtari paraprak ia kaloi çështjen një trupe gjyqësore të Gjykatës së Posaçme për Korrupsionin dhe Krimin e Organizuar (GJKKO). Ai pretendonte shkelje të parimit të “barazisë së armëve”, duke insistuar për të dalë nga “kafazi” i qelqtë dhe për t’u ulur në sallë pranë avokatëve të tij, gjatë proceseve që vazhdojnë të mbahen vetëm me praninë e mbrojtësve të tij ligjorë.
Edhe kjo kërkesë u refuzua. Veliaj kishte adresuar edhe kompetencat e SPAK, duke u përpjekur të shfuqizonte një pikë të ligjit që i jep prokurorit të posaçëm të drejtën të hetojë kolegët dhe gjyqtarët antikorrupsion, në rast dyshimesh të arsyeshme.
Sidoqoftë, pritet që Veliaj të shfrytëzojë këtë vendim në të ardhmen, duke argumentuar mungesën e përfaqësimit të tij të plotë nga avokatët në gjykimin paraprak. Njëkohësisht, ai do të përdorë edhe një fitore të pjesshme të mëparshme në Gjykatën Kushtetuese, e cila urdhëroi Gjykatën e Lartë të rishqyrtojë çështjen e paraburgimit të tij, në raport me detyrën që mban si kryetar bashkie dhe shfaqjen në “kafazin e xhamtë” të sallës së gjyqit.