Lajm i mirë për pelegrinët: Arabia Saudite prezanton vizën njëvjeçare për Umre
Arabia Saudite ka prezantuar një vizë të re, njëvjeçare me hyrje të shumëfishta, e cila do t’u mundësojë pelegrinëve të Umres të kryejnë vizita të përsëritura.
Ministria e Haxhit dhe Umres në Arabinë Saudite njoftoi për vizën e re me hyrje të shumëfishta për pelegrinët e Umres, sipas Euronews.com.
Me vizën e sapo lëshuar, e vlefshme për 365 ditë nga data e lëshimit, vizitorët mund të hyjnë në qytetet e shenjta disa herë për të kryer Umren, për një qëndrim të përgjithshëm jo më të gjatë se 90 ditë.
Sipas Agjencisë Saudite të Shtypit (SPA), ky veprim “përkon me Vizionin Saudit 2030 dhe qëllimet e Programit të Përvojës së Pelegrinëve, me synim lehtësimin e mbërritjes, pasurimin e përvojës së pelegrinëve dhe përmirësimin e efikasitetit të shërbimeve”.
Pelegrinët mund të përdorin vizën e re vetëm nëse blejnë një paketë shërbimi për Umren nga një ofrues i miratuar, duke përdorur platformën Nusuk Umrah të Arabisë Saudite për çdo vizitë. Kjo platformë është një “sportel i vetëm” dixhital i mbretërisë, e cila ofron shërbime si lëshimi i vizave, akomodimi, transporti dhe rezervimet e fluturimeve për pelegrinët.
Kohëzgjatja e paketës nuk duhet të kalojë numrin e ditëve të mbetura në vizë. Pelegrinët duhet të sigurojnë një leje Umre përmes platformës Nusuk përpara mbërritjes në Arabinë Saudite.
“Ministria theksoi se viza rrit fleksibilitetin në planifikimin e vizitave dhe mbështet integrimin e shërbimeve dixhitale e operacionale gjatë gjithë udhëtimit të pelegrinëve”, shtoi Agjencia Saudite e Shtypit.
Pas përfundimit të pelegrinazhit dhe në momentin e largimit, viza çaktivizohet. Ajo mund të riaktivizohet për vizitën e radhës, pasi pelegrini të ketë përmbushur kërkesat rregullatore. Gjithashtu, mbetet joaktive gjatë sezonit vjetor të Haxhit.
Në periudhën e fundit të raportuar, Arabia Saudite ka mirëpritur 931,500 pelegrinë me viza për Umre, duke shënuar një rritje prej 22.5% krahasuar me të njëjtën periudhë të vitit të kaluar. Vizitorët kryesorë ndërkombëtarë kanë ardhur nga Pakistani, Indonezia dhe Iraku.
**Cili është ndryshimi mes Umres dhe Haxhit?**
Ndryshe nga Haxhi, i cili kryhet vetëm gjatë muajit islamik Dhul Hixhxhe çdo vit, Umra është një pelegrinazh vullnetar që mund të kryhet gjatë gjithë vitit, në çdo kohë – prandaj shpesh quhet Haxhi “i vogël”.
Nga ana tjetër, Haxhi është një detyrim fetar që kryhet vetëm një herë në jetë nga myslimanët që janë të aftë financiarisht dhe fizikisht. Ritualet kryesore të tij zgjasin rreth pesë deri në gjashtë ditë, ndërsa Umra zakonisht mund të përfundohet brenda pak orësh.
Në vitin 2025, Arabia Saudite priti më shumë se 1.5 milion pelegrinë të huaj vetëm për Haxh, të cilët mbërritën nga jashtë përmes pikave të ndryshme hyrëse, sipas të dhënave të Autoritetit të Përgjithshëm për Statistikat (GASTAT). Duke përfshirë edhe pelegrinët vendas, numri total arriti në më shumë se 1.6 milionë.