E ardhmja afatgjatë e Mike Maignan te Milani është vënë seriozisht në dyshim pas raportimeve për pakënaqësinë në rritje të portierit me drejtimin aktual të klubit.
Pavarësisht se e mban shiritin e kapitenit dhe është njëra prej figurave kryesore në “San Siro”, francezi thuhet se po i shqyrton opsionet e tij, ndërsa gjigantët e Saudi Pro League, Al-Nassr, po përgatiten ta bëjnë një lëvizje, shkruajnë mediat italiane.
Marrëdhënia mes Maignanit dhe drejtuesve të Milanit duket se ka arritur në një pikë delikate pas fundit të trazuar të sezonit të kaluar.
Edhe pse portieri francez mbetet një prej elementëve më të rëndësishëm të skuadrës kuqezi, zhvillimet e fundit e sugjerojnë një distancim në rritje mes lojtarit dhe drejtuesve të klubit.
Burimi kryesor i pakënaqësisë së Maignan lidhet me ndryshimet e mëdha të bëra në stafin teknik në muajin maj, kur u shkarkuan trajneri Max Allegri, drejtori sportiv Igli Tare dhe trajneri veteran i portierëve, Claudio Filippi.
Maignan e kishte krijuar një marrëdhënie veçanërisht të fortë profesionale me këtë treshe, sidomos me Filippin, ekspertiza e të cilit vlerësohet se e kishte ndihmuar francezin ta ruante statusin e njërit prej portierëve më të mirë në Evropë.
Duke e parë situatën si një mundësi për ta transferuar një futbollist të klasit botëror, Al-Nassr raportohet se ka hyrë në garë, sipas “La Gazzetta dello Sport”, përcjell “Gazeta Express”.
Klubi nga Riadi, që e ka në radhët e tij Cristiano Ronaldon, është aktualisht në kërkim të një portieri të ri për ta zëvendësuar Benton.
Fuqia financiare e kampionatit saudit e përbën një sfidë të veçantë për Milanin, i cili mund ta ketë të vështirë të konkurrojë nëse nis një betejë për një lojtar që tashmë është ndër futbollistët më të paguar të klubit.
Maignan dhe bashkëlojtari i tij Adrien Rabiot e kanë shtyrë rikthimin në Milanello nga data fillestare, 12 gusht, deri më 16 gusht.
Edhe pse klubi e ka paraqitur këtë si një pushim të zgjatur për rikuperim pas angazhimeve në Botëror, situata duket problematike për një klub që po përpiqet të projektojë stabilitet.
Shtyrja shihet gjerësisht si një reflektim i pakënaqësisë së lojtarëve, veçanërisht duke i pasur parasysh lidhjet e tyre të ngushta me ish-stafin teknik.
Francezi e nënshkroi një kontratë të rëndësishme të re në fillim të këtij viti, e cila e lidh me klubin deri në qershor 2031, me një pagë që është në nivel me atë të lojtarit më të paguar të klubit, Rafael Leao.
Marrëveshja, me vlerë rreth 7 milionë euro në vit, përfshirë bonuset, ishte menduar për ta siguruar portën e Milanit për dekadën e ardhshme.