Avokati Skender Musa ka deklaruar se procesi i zgjedhjes së presidentes së Kosovës nuk ka shkelur Kushtetutën. Ai theksoi se votimi u krye brenda afatit kohor të parashikuar, ndërsa numërimi i votave mund të realizohej edhe pas skadimit të këtij afati.
Në një intervistë për “Ekonomia Online”, Musa specifikoi se votimi përfundoi në orën 00:03. Sipas tij, afati kushtetues ka të bëjë drejtpërdrejt me procesin e votimit, dhe jo me atë të numërimit të fletëvotimeve.
“Zgjedhja e presidentes, sipas mendimit tim, nuk ka pasur shkelje kushtetuese, pasi votimet janë kryer deri në orën 00:03. Numërimi i tyre nuk përbën afat kushtetues dhe mund të kryhej edhe më vonë,” u shpreh ai.
Megjithatë, Musa kritikoi ashpër mënyrën se si u krijua kriza institucionale. Ai e cilësoi këtë si një “mungesë serioziteti” nga ana e partisë që fitoi shumicën, duke vënë theksin konkretisht te kryeministri.
“Lidhur me krizat e shkaktuara, unë e kam konsideruar si një mungesë serioziteti nga partia fituese e shumicës, dhe konkretisht nga kryeministri,” deklaroi Musa.
Sipas tij, zgjedhja e presidentes ishte thelbësore, pasi institucionet kishin qenë të bllokuara dhe vendi kishte nevojë urgjente për stabilitet.
“Natyrisht është mirë, sepse institucionet kanë qenë të bllokuara, vendi ka pasur nevojë për stabilitet. Besoj se është një figurë që mund të ngrihet mbi partitë politike dhe të jetë në shërbim të qytetarëve, dhe jo të jetë thjesht zgjedhje e partisë që tashmë ka qeverinë apo e ndonjë partie tjetër të rrethit të saj të ngushtë,” u shpreh ai.
Lidhur me figurën e presidentes, Musa pohoi se edhe pse ajo mund të ketë pasur angazhime të mëparshme në struktura partiake, si ministre apo deputete, si personalitet ajo mund të dëshmojë aftësinë për të vepruar mbi ndikimet partiake dhe të përfaqësojë interesat e të gjithë qytetarëve të Kosovës.