Aktori Belmont Cameli, ylli i serialit ‘Off Campus’ të Prime Video, ka demonstruar se heroizmi tejkalon ekranin, duke dhuruar një veshkë dhe nisur një zinxhir transplantimesh që shpëtoi shtatë jetë.
Vendimi i tij për të dhuruar një veshkë nxiti një zinxhir kompleks transplantimesh, i cili rezultoi në shpëtimin e shtatë jetëve.
Historia nisi në vitin 2018, kur Cameli u informua se miku i tij i fëmijërisë, Brendan Flaherty, kishte nevojë urgjente për një veshkë. Megjithëse aktori nuk ishte një dhurues i pajtueshëm, ai nuk u dorëzua dhe vendosi të merrte pjesë në një program shkëmbimi organesh.
Flaherty ndodhej në gjendje kritike për shkak të dështimit të veshkave, duke mbijetuar me dializë të përditshme dhe kishte kaluar gjashtë vjet në listën e pritjes. Cameli, më pas, ndau në rrjetet sociale statistika alarmante rreth sëmundjes, bashkë me foto nga spitali.
Aktori theksoi: “Çdo ditë, 20 njerëz vdesin duke pritur për një transplant veshke. Pacientët në listën e pritjes kalojnë mesatarisht tre vjet e gjysmë para se të marrin një transplant, dhe kjo vetëm nëse janë me fat.”
Pasi mjekët konfirmuan se Cameli nuk ishte një dhurues i përshtatshëm për mikun e tij, ata i propozuan të merrte pjesë në një program shkëmbimi ndërmjetësimi, i cili lidh çifte dhuruesish dhe marrësish. Veshka e Cameli-t iu transplantua Clotilda Ruizit. Vajza e saj, megjithëse nuk mundi t’i dhuronte një veshkë nënës, ishte e përshtatshme për një pacient tjetër.
Ky zinxhir solidariteti vazhdoi të zgjerohej derisa edhe Flaherty mori një veshkë të përshtatshme nga një dhurues i panjohur.
Në këtë proces të ndërlikuar mjekësor u përfshinë gjithsej 14 persona. Shtatë dhurues i ofruan nga një veshkë shtatë marrësve, duke çuar në shtatë transplante të suksesshme.
Aktori 28-vjeçar reflektoi mbi suksesin, i cili u dha shtatë pacientëve një jetë të re. “Fakti është se shumica prej nesh kanë dy veshka të shëndetshme, ndërsa mijëra njerëz luftojnë çdo ditë me vetëm një që dështon. Unë pata mundësinë dhe privilegjin për të shpëtuar një jetë,” shpjegoi Cameli.
Edhe pse nuk mundi ta ndihmonte drejtpërdrejt mikun e tij, aktori shprehu kënaqësinë për rezultatin. “Për fat të mirë, pas gjashtë vitesh pritjeje të vështirë, Brendani mori organin që kishte pritur kaq gjatë, dhe Clotilde më në fund do të ketë një veshkë të shëndetshme dhe një fillim të ri në jetë,” shtoi Cameli.
Burimi: Indeksonline