PDK dhe AAK kërkojnë zhbllokimin e institucioneve: Adresa e bllokadës është Albin Kurti
Deputetë të Partisë Demokratike të Kosovës (PDK) dhe të Aleancës për Ardhmërinë e Kosovës (AAK), bashkë me asamblistë nga Prishtina, protestuan sërish para ndërtesës së Qeverisë së Kosovës, duke kërkuar thirrjen e seancës konstituive të Kuvendit. Ata akuzuan kryeministrin Albin Kurti se po mban vendin në bllokadë.
Asamblisti në Komunën e Prishtinës, Yll Muriqi, deklaroi se institucionet nuk po funksionojnë dhe se vendi është në një bllokadë të plotë. “Sërish jemi mbledhur para jush për të kërkuar llogari nga deputeti Albin Kurti, i cili e ka sjellë vendin në bllokadë totale. Institucionet nuk po funksionojnë, vendi është paralizuar dhe problemet qytetare vetëm po vijnë duke u grumbulluar,” tha Muriqi. Ai shtoi se në vend të zgjidhjeve, po ofrohet vetëm propagandë, dhe se “Kosova nuk mund të mbahet peng nga paaftësia e një njeriu kokëfortë siç është Albin Kurti, i cili nuk di të qeverisë.”
Deputeti i PDK-së, Artan Behrami, theksoi se vendi ndodhet në një krizë kushtetuese, politike dhe ekonomike shumëplanëshe. Ai akuzoi kryeministrin Kurti se ka “uzurpuar dhe okupuar” ndërtesën e Qeverisë, duke e mbajtur Kosovën peng dhe në kriza të vazhdueshme. Behrami e përshkroi situatën si krizën më të thellë kushtetuese dhe politike që nga historia dhe paslufta e Kosovës, si dhe një krizë ekonomike e marrëdhënies me aleatët. Ai ngriti pyetje mbi shpenzimin e një buxheti prej 4 miliardë eurosh pa projekte në shëndetësi, infrastrukturë apo arsim, duke e quajtur gjendjen “kolaps total.” Behrami bëri thirrje për kthimin në Kuvend, konstituimin e institucioneve dhe adresimin e sfidave. Ai paralajmëroi se “përpjekja e zotit Kurti, këto tundime për t’u shndërruar në një autokrat do të dështojnë,” pasi opozita do të veprojë për të kthyer Kosovën në binarët kushtetues.
Ndërkaq, deputetja e AAK-së, Time Kadrijaj, sqaroi se aksionet po zhvillohen për të tërhequr vëmendjen dhe për të kërkuar kthimin në institucione dhe në kushtetutshmëri. Ajo theksoi ngecjet në çdo sektor, duke fajësuar Albin Kurtin që, sipas saj, nuk po e konstituon Kuvendin. Kadrijaj përmendi probleme konkrete: vështirësitë në arsim si fillimi i procesit mësimor pa ditarë dhe komplikimet me testet shkollore, si dhe mungesën e barnave në onkologji e sektorë të tjerë të shëndetësisë, çka detyron pacientët t’i blejnë vetë me kosto të lartë. Ajo shtoi se Ministria e Shëndetësisë nuk ka hapur konkurse për specializantë prej vitesh, duke krijuar një “bllokadë totale.” Kadrijaj përfundoi duke theksuar se “adresa e kësaj bllokade, adresa e së keqes së këtij vendi është Albin Kurti.”