Pjesëmarrja e Iranit në Kupën e Botës 2026 është vënë në dyshim, duke shtyrë FIFA-n të nisë negociata urgjente. Sekretari i Përgjithshëm i FIFA-s, Mattias Grafström, pritet të takohet këtë të shtunë në Stamboll me zyrtarë të Federatës Iraniane të Futbollit (FFIRI). Gjatë këtij takimi, ai do të tentojë të ofrojë “garanci” për pjesëmarrjen e Iranit në Kampionatin Botëror, sipas një burimi të agjencisë Reuters, i afërt me bisedimet.
Megjithëse Irani ka planifikuar të luajë të tria ndeshjet e fazës së grupeve të Kupës së Botës në Shtetet e Bashkuara, pjesëmarrja e ekipit në turneun që do të zhvillohet nga 11 qershori deri më 19 korrik është bërë problematike pas sulmeve të SHBA-së dhe Izraelit ndaj Iranit në fund të shkurtit.
Dyshimtë të tjera u shtuan pasi presidentit të FFIRI-së, Mehdi Taj, iu mohua hyrja në Kanada për Kongresin e FIFA-s në Vankuver në fillim të këtij muaji. Arsyeja ishin lidhjet e tij me Gardën Revolucionare Islamike (IRGC).
Shtetet e Bashkuara dhe Kanadaja, bashkë-organizatore të Kupës së Botës së bashku me Meksikën, e cilësojnë IRGC-në si “organizatë terroriste”. Ato kanë deklaruar qartë se nuk do të lejojnë hyrjen e personave me lidhje me këtë forcë ushtarake elitare.
Këtë javë, zëvendësministri iranian për Çështje Ligjore dhe Ndërkombëtare, Kazem Gharibabadi, theksoi në rrjetet sociale se FIFA ka detyrimin të garantojë hyrjen e të gjitha ekipeve dhe delegacioneve të tyre në vendet organizatore. Ai shtoi se Kombëtarja iraniane e ka merituar pjesëmarrjen në fushë sipas rregulloreve të FIFA-s. Çdo pengesë për lojtarët, stafin teknik apo zyrtarët iranianë do të ishte në kundërshtim me shpirtin e Kupës së Botës. Gharibabadi paralajmëroi se, nëse organizatorët nuk sigurojnë hyrje të barabartë dhe pa diskriminim për të gjitha ekipet e kualifikuara, duke përfshirë Iranin, do të dëmtohet besueshmëria e vetë Kupës së Botës.
Burimi i Reuters theksoi se FIFA po bashkëpunon ngushtë me autoritetet përkatëse për të garantuar që të gjitha ekipet pjesëmarrëse të garojnë në një mjedis të sigurt.
Donald Trump deklaroi dy javë më parë se ishte “në rregull” me pjesëmarrjen e Iranit në Kupën e Botës, pavarësisht tensioneve mes dy vendeve pas sulmeve ajrore ndaj Republikës Islamike.
Irani kishte kërkuar zhvendosjen e ndeshjeve të tij të Kupës së Botës në Meksikë, por presidenti i FIFA-s, Gianni Infantino, ka insistuar që të gjitha ndeshjet të luhen në stadiumet e planifikuara fillimisht.
Kombëtarja iraniane do të niset nga Teherani të hënën drejt një kampi stërvitor në Turqi. Më pas, në fillim të qershorit, ajo do të zhvendoset në bazën e saj në SHBA, në Kompleksin Sportiv Kino në Tucson të Arizonës.
Irani pritet ta nisë fushatën e tij në Kupën e Botës FIFA 2026 më 15 qershor në Los Anxhelos, kundër kombëtares së Zelandës së Re në futboll.