**Aksion antidrogë në Vërmicë: E dyshuara ndërron jetë në spital pas arrestimit**

Policia e Kosovës ka dhënë detaje rreth një aksioni antidrogë të zhvilluar në Vërmicë, ku si pasojë e përkeqësimit të gjendjes shëndetësore, një prej të dyshuarave ka ndërruar jetë në spital.

Më 15 nëntor 2026, rreth orës 18:00, bazuar në informacione operative hetimore nga Drejtoria për Hetimin e Trafikimit të Narkotikëve (DHTN) në Prishtinë, për trafikim të dyshuar droge nga një burrë kosovar, një veturë BMW me targa lokale u ndalua në Vërmicë. Brenda saj u gjetën dy persona, një burrë dhe një grua, shtetas kosovarë, të cilët dyshoheshin për përfshirje në këtë aktivitet.

Gjatë kontrollit të veturës, policia gjeti dhe konfiskoi 105.7 gramë kokainë, dy fishekë të kalibrit 9×19 mm dhe dy telefona celularë. Të dyshuarit, të cilët ishin të njohur për policinë, u shoqëruan. Më pas, me urdhër të prokurorit, u bastis edhe shtëpia e burrit të dyshuar, ku u gjet dhe u konfiskua një detektor për identifikimin e pajisjeve GPS dhe kamerave.

Pas caktimit të avokatit mbrojtës për të dy palët, burri i dyshuar u intervistua dhe, me vendim të prokurorit, iu caktua masa e ndalimit për 48 orë. Ndërsa, gruas së dyshuar, gjatë fillimit të intervistimit në prani të avokatit, iu përkeqësua papritur gjendja shëndetësore, duke bërë të nevojshme thirrjen e ndihmës emergjente nga Spitali i Përgjithshëm Rajonal në Prizren.

Pas ndihmës së parë mjekësore të ofruar në vendngjarje, ajo u transportua nga ekipi i emergjencës në Spitalin e Përgjithshëm për trajtim të mëtejshëm. Megjithatë, rreth orës 01:30, mjekët kompetentë njoftuan Policinë se gruaja kishte ndërruar jetë.

Për rastin u njoftuan menjëherë njësitet hetimore të Stacionit Policor në Prizren, Sektori Rajonal i Hetimeve, Inspektorati Policor i Kosovës (IPK) dhe prokurori kujdestar. Të gjitha njësitë kompetente policore, përfshirë hetuesinë dhe forenzikën, dolën në vendin e ngjarjes dhe ndërmorën veprimet e para hetimore për zbardhjen e plotë të rrethanave. Pas përfundimit të procedurave fillestare dhe sigurimit të dokumentacionit mjekësor, trupi i pajetë i gruas së ndjerë, me urdhër të prokurorit kujdestar, u dërgua në Institutin e Mjekësisë Ligjore në Prishtinë për obduksion.