**Operacion antidrogë në Kosovë: Sekuestrohen 37 kg heroinë, arrestohen pesë persona**
Policia e Kosovës, në bashkëpunim me Prokurorinë Speciale të Republikës së Kosovës (PSRK) dhe me mbështetjen e Agjencisë Kosovare për Inteligjencë (AKI), ka zhvilluar më 3 nëntor 2026 një operacion të gjerë në rajonet e Ferizajt dhe Prishtinës. Ky aksion, i realizuar pas një hetimi të thelluar, rezultoi me arrestimin e pesë personave dhe sekuestrimin e 37 kilogramëve substancë të dyshuar si heroinë.
Gjatë një konference për media, ushtruesi i detyrës së Kryeprokurorit të PSRK-së, z. Dren Paca, deklaroi se ky ishte njëri ndër operacionet më të mëdha të k këtij lloji të ndërmarra në vend. Ai theksoi rëndësinë e angazhimit të koordinuar institucional në luftimin e trafikimit të narkotikëve dhe të krimit të organizuar.
Prokurori Dema bëri të ditur se, sipas dyshimeve fillestare, sasia e narkotikëve dyshohet të jetë transportuar nga vendet aziatike drejt Republikës së Kosovës. Ai theksoi gjithashtu se ndaj të dyshuarve do të ndërmerren të gjitha veprimet e mëtejshme procedurale, në përputhje me Kodin e Procedurës Penale.
Drejtori i Drejtorisë për Hetimin e Trafikimit me Narkotikë në Policinë e Kosovës (PK), z. Reshat Murseli, detajoi sendet e tjera të sekuestruara gjatë operacionit:
* 5,300 Euro dhe 100 Dollarë amerikanë në para të gatshme;
* Një automjet;
* Dhjetë telefona celularë;
* Një pajisje DVR për regjistrimin e kamerave të sigurisë;
* 15 fishekë të kalibrit 9×19 mm;
* Një pajisje prerëse.
Me urdhër të PSRK-së, të dyshuarit janë ndaluar për 48 orë. Ata ngarkohen me dyshimin për kryerjen e veprave penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” dhe “Pjesëmarrja ose organizimi i grupit kriminal të organizuar”.
Policia e Kosovës, në bashkëpunim dhe koordinim të vazhdueshëm me Prokurorinë Speciale, do të vazhdojë ndërmarrjen e veprimeve të mëtejshme hetimore dhe procedurale lidhur me këtë rast.