Instituti i Shëndetit Publik (ISHP) në Maqedoninë e Veriut ka konfirmuar rastin e parë të etheve të Nilit Perëndimor për këtë vit. Bëhet fjalë për një burrë 55-vjeçar nga Velesi, i cili fillimisht u paraqit me simptoma të rënda shëndetësore, por tashmë është stabilizuar pas ndërhyrjes mjekësore në Shkup.
Pacienti kërkoi ndihmë mjekësore pasi përjetoi temperaturë të lartë të menjëhershme, dobësi të theksuar, skuqje të lëkurës dhe një përkeqësim gradual të gjendjes mendore. Për shkak të rëndimit serioz të simptomave, ai u shtrua urgjentisht në Klinikën për Sëmundje Infektive dhe Gjendje Febrile në Shkup. Pas ndërhyrjes së duhur mjekësore, gjendja e tij shëndetësore u stabilizua.
Testet laboratorike konfirmuan infeksionin me virusin e Nilit Perëndimor, përmes pranisë së antitrupave IgM në lëngun cerebrospinal, çka tregonte përfshirjen e sistemit nervor qendror.
Autoritetet shëndetësore bëjnë me dije se rreziku për popullatën e përgjithshme vlerësohet aktualisht si i moderuar. Megjithatë, theksohet se ky rrezik mund të reduktohet ndjeshëm nëpërmjet zbatimit të vazhdueshëm të masave mbrojtëse personale kundër pickimeve të mushkonjave.
Profesionistët mjekësorë ritheksojnë se nuk ekziston kurë apo vaksinë specifike për ethet e Nilit Perëndimor, prandaj terapia është simptomatike dhe mbështetëse.
Shërbimet shëndetësore apelojnë për kujdes të shtuar gjatë periudhës së aktivitetit të shtuar të mushkonjave, duke rekomanduar përdorimin e repelentëve, veshjen e rrobave mbrojtëse, instalimin e rrjetave në dritare dhe eliminimin e rregullt të ujit të ndenjur.