Sekretari Amerikan i Shtetit Marco Rubio ka theksuar dëshirën e Shteteve të Bashkuara për të mbetur anëtare e NATO-s, por me kushtin e reformave të thella brenda aleancës ushtarake.
Duke folur para Komitetit për Çështjet e Jashtme të Dhomës së Përfaqësuesve në Uashington, Rubio njoftoi se Presidenti Trump do të marrë pjesë në samitin e NATO-s muajin e ardhshëm në Turqi, i cili do të mbahet në Ankara më 7 dhe 8 korrik. Aty, Presidenti pritet të paraqesë kërkesat e SHBA-së për ndryshime dhe të ripërsërisë thirrjen drejtuar vendeve aleate për të rritur shpenzimet e tyre për mbrojtjen.
“Ne jemi ende anëtarë të NATO-s, por NATO ka nevojë për ndryshime të thella, dhe Presidenti e ka bërë të qartë këtë,” tha Rubio. Një ndër pikat kryesore të pakënaqësisë së Presidentit Trump është refuzimi i disa vendeve anëtare, në veçanti Spanjës, për t’i lejuar SHBA-të të përdorin bazat ajrore për luftën kundër Iranit.
Gjatë të njëjtit seancë, Sekretari i Shtetit iu bë gjithashtu pyetje për interesin e Presidentit Trump lidhur me Groenlandën. Rubio theksoi se “për momentin” Groenlanda është pjesë e Danimarkës, por shtoi se diskutimet për përdorimin e këtij territori për qëllime të mbrojtjes kolektive janë në vazhdim. Ai nuk dha detaje të mëtejshme, por shprehu optimizëm, duke deklaruar: “Mendoj se do të kemi disa lajme shumë të mira.”