Sadiku: Rrënimi i institucioneve, më i dëmshëm për shtetin se korrupsioni e plumbat
Deputeti i LDK-së, Ermal Sadiku, ka theksuar se shkatërrimi i rregullave dhe institucioneve përfaqëson dëmin më të madh që mund t’i shkaktohet një shteti, duke e renditur atë para korrupsionit, nepotizmit apo madje edhe konflikteve ushtarake. Kjo deklaratë vjen si reagim ndaj zhvillimeve rreth konstituimit të Kuvendit të Kosovës.
Sadiku ka kritikuar ashpër Lëvizjen Vetëvendosje dhe deputetët e saj, duke pretenduar se me kalimin e afatit prej 48 orësh, është shkelur edhe Rregullorja e Kuvendit të Kosovës.
Në një postim të tij, Sadiku ka shkruar: “Asgjë nuk e dëmton shtetin më shumë sesa rrënimi i rregullave dhe institucioneve të tij. As korrupsioni, as nepotizmi, as tanket e as plumbat.”
Sipas deputetit të LDK-së, brenda një periudhe të shkurtër kohore, janë shkelur disa prej akteve dhe vendimeve më të rëndësishme institucionale. Ai theksoi se “për vetëm një muaj kanë arritur të shkelin Kushtetutën, Aktgjykimin e Gjykatës Kushtetuese dhe Rregulloren e Kuvendit.”
Sadiku ngriti gjithashtu pyetjen retorike: “Tani më tregoni: cili armik i një shteti mund t’i bëjë këto më shpejt e më keq? Si mund të dëmtohet një shtet më shumë se kaq?”
Ai shtoi se problemi nuk qëndron vetëm te mënyra e qeverisjes, por te dëmtimi i vetë themeleve institucionale. “Kur e shkel Kushtetutën, e shpërfill Gjykatën dhe e shkel Rregulloren e institucionit më të lartë përfaqësues, nuk jeni vetëm duke e keqqeverisur shtetin. Jeni duke ia rrënuar themelet. Këta më nuk janë amatorë. Janë shkatërrues. Janë dëmtues të shtetit,” përfundoi Sadiku, duke shprehur qartazi shqetësimin e tij.