**Tirana dhe Prishtina thellojnë bashkëpunimin ndërinstitucional për arkivat**
Tirana dhe Prishtina po thellojnë bashkëpunimin në fushën e arkivave, me fokus forcimin e lidhjeve ndërinstitucionale. Një takim i rëndësishëm u zhvillua mes Drejtorit të Përgjithshëm të Arkivave të Shqipërisë, Auron Rrokaj, dhe kryetarit të Komunës së Prishtinës, Përparim Rama, ku ishte i pranishëm edhe Ambasadori i Shqipërisë në Kosovë, Petrit Malaj.
Ambasada e Shqipërisë në Kosovë, përmes një njoftimi në Facebook, theksoi rëndësinë kyçe të arkivave në ruajtjen e kujtesës kombëtare, dokumentimin e historisë dhe trashëgimisë së përbashkët ndër breza.
Në thelb të kësaj iniciative, Ambasada theksoi se “Arkivat janë shumë më tepër se ruajtës të dokumenteve historike; ato përfaqësojnë kujtesën kombëtare, dëshmojnë rrugëtimin tonë historik dhe lidhin brezat me identitetin dhe trashëgiminë tonë të përbashkët.” Për këtë qëllim, u evidentua se “shkëmbimi i përvojave, digjitalizimi, restaurimi dhe organizimi i aktiviteteve të përbashkëta kulturore krijojnë mundësi të reja për ruajtjen dhe promovimin e kësaj pasurie të çmuar.”
Ky afrim i institucioneve shqiptare, siç thuhet në njoftim, “është një tjetër hap drejt forcimit të lidhjeve mes Shqipërisë dhe Kosovës, në shërbim të kujtesës historike, kulturës dhe identitetit tonë kombëtar.” Mesazhi përmbyllës thekson: “Më shumë bashkëpunim, më shumë kujtesë të përbashkët, më shumë ura mes Tiranës dhe Prishtinës!”