**Shqipëria synon kreun e grupit me fitore ndaj Finlandës**
Juljan Shehu dhe Etrit Berisha, përfaqësues të Kombëtares Shqiptare, kanë zhvilluar një konferencë për shtyp të hënën, në prag të dy ndeshjeve të fundit në Ligën e Kombeve kundër Finlandës dhe Bjellorusisë.
Ata janë shprehur optimistë se Shqipëria do të ruajë vendin e parë në Grupin C1 të Ligës së Kombeve.
Duke folur për sfidat, mesfushori Shehu theksoi: “Unë besoj se çdo ndeshje ka vështirësinë e vet dhe ne duhet të japim maksimumin e ta përgatisim atë në mënyrën më të mirë të mundshme. Presioni është pjesë e lojës, jemi profesionistë dhe duhet të dimë si ta përballojmë. Objektivi ynë është të qëndrojmë në vendin e parë në grup, të ruajmë kryesimin dhe besoj se deri në fund do t’ia dalim”.
Kombëtarja shqiptare do të presë Finlandën të enjten në stadiumin “Air Albania”, ndërsa më 15 nëntor do të përballet me Bjellorusinë në Budapest të Hungarisë.
Këto dy ndeshje janë vendimtare për garën drejt vendit të parë në Ligën C dhe ngjitjen në Ligën B.
Aktualisht, Shqipëria kryeson grupin me 9 pikë. Bjellorusia dhe Finlanda ndajnë vendin e dytë dhe të tretë me nga 7 pikë, ndërsa San Marino mbetet në fundin e tabelës.
Burimi: Indeks Online