Tre aktorë të “Home Alone 2” ndërrojnë jetë brenda një viti, fansat spekulojnë për “mallkim”
Fansat e filmit klasik të Krishtlindjeve, “Home Alone 2: Lost in New York”, janë thellësisht të pikëlluar pas vdekjes së aktorit të njohur britanik Tim Curry. Kjo tragjedi vjen në një kohë kur është vënë re një rastësi e trishtë: ai është aktori i tretë nga kasti i këtij filmi që ka ndërruar jetë brenda një viti.
Curry, i mirënjohur për rolet e tij ikonike në filma si “The Rocky Horror Picture Show” dhe “It”, ndërroi jetë në moshën 80-vjeçare. Në “Home Alone 2”, ai luante personazhin e z. Hector, portierit të dyshimtë të hotelit Plaza në Nju Jork.
Vdekja e tij pason atë të aktores Brenda Fricker, e cila interpretonte “Zonjën e Pëllumbave”, si dhe të Catherine O’Hara, e cila portretizonte Kate McCallister, nënën e Kevinit.
Kjo seri vdekjesh ka shtyrë disa fansa në rrjetet sociale të komentojnë me shaka se kasti i “Home Alone 2” është “i mallkuar”. Një postim viral në platformën X (ish-Twitter) shkruante: “Rishikimi i Home Alone 2 këtë Krishtlindje do të jetë VËRTET emocional”, shoqëruar me fotografi të tre aktorëve në rolet e tyre të paharrueshme në film.
Të tre aktorët ishin pjesë e disa prej skenave më të paharrueshme të filmit, prandaj ky lajm ka prekur veçanërisht fansat që janë rritur duke parë këtë klasik të Krishtlindjeve.
Megjithatë, duhet theksuar se nuk ka asnjë provë për ndonjë “mallkim”. Bëhet fjalë për një rastësi fatkeqe, pasi të tre aktorët ishin në moshë të thyer.
Tim Curry lë pas një trashëgimi të pasur artistike dhe një karrierë thuajse gjashtëdekadëshe, me role të paharrueshme në “The Rocky Horror Picture Show”, “Clue”, “It”, “Annie” dhe “Home Alone 2”.
/Indeksonline/