Presidenti amerikan, Donald Trump, ka njoftuar shtyrjen për tre ditë të vendosjes së tarifave të reja mbi një gamë të gjerë mallrash kanadeze, ndërsa të dy vendet janë pranë arritjes së një marrëveshjeje tregtare të re. Lajmin e raportoi BBC.
Përmes një postimi në rrjetet sociale, Trump deklaroi: “Kam pezulluar tarifat 50% kundër Kanadasë, të cilat ishin planifikuar të hynin në fuqi nesër në mëngjes për një periudhë tre-ditore, bazuar në faktin se Kanadaja dhe SHBA-ja, në varësi të finalizimit të dokumenteve, kanë një MARRËVESHJE!”
Ky njoftim u bë më pak se dy orë para afatit për vendosjen e një takse prej 50% mbi importet kanadeze, me vlerë rreth 20 miliardë dollarë (14.8 miliardë paund; 28 miliardë dollarë kanadezë).
Marrëdhëniet tregtare mes dy vendeve kishin qenë në një ngërç për disa çështje kyçe, si tarifat amerikane për automjetet dhe ndalimi nga disa provinca kanadeze i shitjes së pijeve alkoolike amerikane.
Përfaqësues të lartë tregtarë të të dy vendeve u takuan të mërkurën në mëngjes në Uashington, menjëherë pas vendimit të Trump për pezullimin e tarifave, çka tregon se bisedimet për një marrëveshje të mundshme janë ende në zhvillim.
Gjatë një prononcimi për gazetarët të mërkurën, Trump e përshkroi marrëveshjen si “shumë të mirë” për të dyja vendet. Ai la të kuptohej se ajo do të përfshinte lëshime nga Kanadaja në sektorin e bujqësisë dhe prodhimit, si dhe një ulje të disa tarifave amerikane ndaj importeve kanadeze.
Presidenti Trump dhe kryeministri kanadez, Justin Trudeau, kanë biseduar dy herë këtë javë. Negociatorët e tregtisë kanë zhvilluar bisedime intensive që nga korriku, kur presidenti amerikan kërcënoi me vendosjen e tarifave të reja, duke vendosur një afat deri më 19 gusht.