Tottenham Hotspur ka bërë zyrtar transferimin e mbrojtësit skocez, Andy Robertson, i cili do t’i bashkohet skuadrës londineze më 1 korrik, pas përfundimit të kontratës së tij me Liverpoolin.
Klubi nga Londra e konfirmoi lajmin përmes një komunikate zyrtare, duke theksuar kënaqësinë për afrimin e një prej mbrojtësve më të suksesshëm të futbollit anglez në vitet e fundit.
Kapiteni i kombëtares së Skocisë sjell te Tottenhami një përvojë të gjerë dhe një numër të madh trofesh të fituara gjatë karrierës së tij të shkëlqyer te Liverpooli. Robertson ishte një nga figurat kyçe të “The Reds”, duke kontribuar në triumfet e klubit në Premier League, Ligën e Kampionëve dhe gara të tjera të rëndësishme.
Në komunikatën e Tottenhamit, Robertson u vlerësua jo vetëm për cilësitë e tij teknike dhe taktike në fushë, por edhe për aftësitë e tij udhëheqëse, të dëshmuara si kapiten i Skocisë dhe si një nga lojtarët më të respektuar në futbollin britanik.
Me këtë lëvizje, Tottenham siguron një përforcim me përvojë të madhe për repartin mbrojtës, ndërsa Robertson do të nisë një kapitull të ri në karrierën e tij pas viteve të arta të kaluara në “Anfield”.