**Trump zotohet për rritjen e presionit ndaj Rusisë për t’i dhënë fund luftës në Ukrainë**
Presidenti amerikan Donald Trump ka deklaruar se do të bëjë gjithçka për të rritur presionin ndaj Rusisë, me qëllim që t’i jepet fund luftës në Ukrainë. Kjo deklaratë erdhi pas një takimi që ai e cilësoi si “shumë të mirë” me presidentin ukrainas Volodymyr Zelensky, i zhvilluar të martën në margjinat e samitit të G7-s.
Këto deklarata kanë ngjallur optimizëm te liderët e G7-s për mundësinë e arritjes së një marrëveshjeje paqeje mes Ukrainës dhe Rusisë.
Atmosfera pozitive, në lidhje me përfundimin e një lufte që tashmë ka hyrë në vitin e pestë, shënon një kontrast të theksuar me takimin e Zelenskyt me Trumpin vitin e kaluar në Zyrën Ovale. Atëherë, presidentit ukrainas iu tha se nuk kishte ndikim mbi bisedimet e mundshme të paqes me Rusinë.
Zelensky, së bashku me aleatët evropianë, janë mbledhur në samitin aktual të G7-s, që po mbahet në një resort francez. Ata shpresojnë t’i dëshmojnë Trumpit se pozita e Ukrainës në fushëbetejë është përmirësuar ndjeshëm, falë sulmeve me dronë thellë brenda territorit rus.
Ndërkohë, Trump, i cili mbërriti në samit pasi kishte arritur paraprakisht një marrëveshje për t’i dhënë fund konfliktit me Iranin, përsëriti zotimin e tij për t’i dhënë fund luftës në Ukrainë. Megjithatë, ai nuk ofroi detaje konkrete mbi masa të reja që do të rrisnin presionin ndaj Moskës.
Kancelari gjerman, Friedrich Merz, e vlerësoi deklaratën e Trumpit si një sinjal pozitiv.
“E gjeta atë shumë bashkëpunues dhe e pashë duke dëgjuar me shumë vëmendje,” u shpreh Merz para gazetarëve. “Në këtë drejtim, kjo më jep sërish njëfarë optimizmi se ne, si evropianë dhe amerikanë, po bëjmë gjithçka së bashku për t’i dhënë fund luftës.”
Pas takimit të liderëve të G7-s me Trumpin, Zelensky i deklaroi agjencisë Reuters se udhëheqësit e grupit ishin pajtuar se Rusia nuk po e fiton luftën.
Ai shtoi se gjatë takimeve ishin diskutuar gjithashtu sanksione të reja kundër Rusisë, të cilat do të synonin eksportet e naftës, sektorin bankar dhe industrinë ushtarake të vendit. Qëllimi është rritja e presionit ndaj Moskës për t’u ulur në tryezën e negociatave.