**Bielsa kritikon ashpër pauzat për hidratim në Kupën e Botës: “Nuk sjellin asgjë, heqin shumë”**
Trajneri i Kombëtares së Uruguait, Marcelo Bielsa, ka kritikuar ashpër vendimin për futjen e pauzave për hidratim në Kupën e Botës, duke theksuar se ato nuk i shtojnë asgjë futbollit.
FIFA vendosi pauza tre-minutëshe midis dy pjesëve të ndeshjeve, për shkak të temperaturave të larta në qytetet pritëse në Shtetet e Bashkuara, Kanada dhe Meksikë. Megjithatë, këto pauza kanë ndezur debat të gjerë, me kritikët që argumentojnë se ato shërbejnë kryesisht si kohë shtesë komerciale për transmetuesit.
“Luajtja e një ndeshjeje në katër pjesë, në vend të dy pjesëve tradicionale, ndryshon thelbin kulturor mbi të cilin është ndërtuar koncepti i futbollit,” u shpreh Bielsa para gazetarëve, sipas agjencisë Reuters.
Ai shtoi: “Ky ndryshim nuk sjell asgjë dhe heq shumë. Do të them thjesht se para këtij vendimi, futbolli kishte tiparet e tij, ndërsa tani ka të tjera. Njerëzit dashurojnë këtë lojë pikërisht për shkak të karakteristikave të saj.”
Bielsa bëri një dallim të qartë mes inovacioneve teknologjike dhe ndërprerjeve me sfond komercial.
“Sigurisht, ne e mirëpresim dhe e vlerësojmë teknologjinë si VAR. Teknologjia ofron më shumë mundësi. Me këto ndërprerje, qëllimi është i ndryshëm, dhe përfundimet që nxirren nuk janë realisht të miat. Unë thjesht përsëris atë që dëgjoj,” përfundoi ai, duke aluduar për natyrën komerciale të tyre.
Ndërkohë, Uruguaji do të zhvillojë ndeshjen e radhës ndaj Cape Verdes në mesnatë.