Strategjia e Heshtjes: Pse Princesha Kate Middleton Flet Pak?
Princesha e Uellsit, Kate Middleton, e martuar me Princin William më 29 prill 2011, ka qenë prej më shumë se 15 vitesh një prej figurave më të vëzhguara të familjes mbretërore britanike. Sipas historianes mbretërore Catherine Mayer, princesha ka gjetur një mënyrë “tejet të mençur” për t’i bërë ballë presionit të vazhdueshëm që sjell ky rol.
Duke folur në një episod të podkastit mbretëror të revistës “Hello!”, Mayer theksoi se Kate flet shumë pak në publik dhe pothuajse asnjëherë nuk zbulon detaje intime nga jeta e saj personale.
“Ajo ka bërë një punë jashtëzakonisht të zgjuar për të gjetur mënyrën e duhur të përshtatjes me institucionin mbretëror,” u shpreh Mayer, duke shtuar: “Kjo nuk do të thotë se e ka pasur të lehtë.”
Autorja e librit “Përça dhe Mbretëro: Gratë Mbretërore dhe Betejat e Tyre” shtoi se mbretëresha e ardhshme ka përzgjedhur me kujdes edhe rrethin e saj shoqëror. “Ajo flet shumë pak dhe pothuajse kurrë nuk rrëfen detaje personale. Ajo dhe William kanë zgjedhur gjithashtu një grup miqsh që, siç dihet, flasin me mediat vetëm kur u kërkohet dhe jo publikisht. Përndryshe, nuk flasin fare,” shpjegoi Mayer.
Kate u njoh me William në vitin 2001, kur të dy ishin studentë të vitit të parë në Universitetin e Shën Andrews. Historiania beson se studimet e saj për histori arti, të cilat i përfundoi në vitin 2005, e kanë ndihmuar të kuptojë më mirë funksionimin e imazhit publik.
“Kam vënë re se si ajo e zotëronte gjithnjë e më shumë menaxhimin e imazhit,” tha Mayer. “Nuk bëhet fjalë vetëm për përfshirjen e saj në Galerinë Kombëtare të Portreteve apo faktin që shkrep vetë fotografi. Ajo e kupton shumë mirë si të përdorë imazhin për të përmbushur rolin mbretëror.”
Princesha publikon shpesh fotografi të realizuara prej saj të fëmijëve, Princit George, Princeshës Charlotte dhe Princit Louis. Sipas Mayer, kjo është një strategji e mençur për të kontrolluar nivelin e ekspozimit të tyre ndaj publikut.
“Ajo konsiderohet edhe si ideatorja e idesë për të publikuar fotografi intime familjare, jo për të cenuar privatësinë e saj, por pikërisht për ta mbrojtur atë, sepse kështu fotografitë e paparacëve humbasin vlerën që do të kishin në rrethana të tjera. Është vërtet shumë e zgjuar,” theksoi ajo.
Në një intervistë për revistën “People”, Mayer u shpreh se sot Kate është figura më e dashur dhe më e kërkuar e familjes mbretërore. “Kate është personi më pranë statusit të një ylli të madh në familjen mbretërore dhe është ajo që të gjithë duan të shohin.”
Sipas saj, kjo përbën një barrë të rëndë, veçanërisht për dikë që ka kaluar sfida serioze shëndetësore, duke iu referuar diagnozës së saj me kancer në vitin 2024. Pas njoftimit publik të diagnozës në mars të atij viti, paraqitja e saj e parë publike ishte në ceremoninë tradicionale të qershorit.
“Kate jo vetëm që duhej të dukej energjike dhe në kontroll të rolit të saj, por e dinte se do të analizohej më shumë se kurrë më parë,” tha Mayer.
Në vitin 2025, Kate njoftoi se sëmundja ishte në fazë remitence dhe që atëherë i është rikthyer gradualisht detyrave të saj mbretërore. Ajo ka marrë pjesë në aktivitete zyrtare brenda dhe jashtë Britanisë së Madhe, përfshirë vizitën në Reggio Emilia të Italisë muajin e kaluar, udhëtimi i saj i parë ndërkombëtar i vetme pas diagnozës, i cili tërhoqi vëmendje të madhe mediatike.