Qeni që bëri bujë në internet: Parashikoi saktë rezultatin e ndeshjes Angli-Kroaci
Anglia mposhti Kroacinë me rezultat 4-2 të mërkurën e kaluar, më 17 qershor, në një ndeshje që tërhoqi vëmendjen e miliona tifozëve. Megjithatë, përtej fushës së blertë, ishte një qen ai që vodhi shfaqjen, pasi thuhet se parashikoi saktë rezultatin e takimit.
Në këtë përballje, kapiteni Harry Kane shënoi dy gola, përfshirë një penallti të përsëritur, ndërsa Jude Bellingham dhe Marcus Rashford shtuan nga një tjetër, duke siguruar fitoren bindëse të Anglisë.
Ndërkohë që tifozët anglezë festonin rezultatin e shkëlqyer, vëmendja e publikut u zhvendos drejt një historie të pazakontë jashtë fushës, siç raporton gazeta “Mirror”. Një pronar pretendonte se qeni i tij kishte “parashikuar” rezultatin, duke i dhënë atij besim të plotë në fitoren e Anglisë.
Protagonisti i kësaj historie është Bug, një qen i racës Brussels Griffon, i cili është kthyer në një fenomen në Instagram. Me mijëra ndjekës në llogarinë e tij @bugthebrusselsgriffon, Bug është i njohur për aftësitë e tij në “modelim, aktrim dhe komentim sportiv”.
Para ndeshjes, pronari i Bug-ut kishte publikuar një postim ku ndante “parashikimin” e qenit për rezultatin. Ajo që e bën historinë edhe më interesante është fakti se Bug kishte “zgjedhur” saktë Anglinë si skuadrën fituese.