Liverpooli përuron memorialin “Forever 20” në Anfield në kujtim të Diogo Jotës dhe Andre Silvës
Liverpooli ka zbuluar një memorial të përhershëm në “Anfield”, në nderim të sulmuesit Diogo Jota dhe vëllait të tij, Andre Silva. Inaugurimi i veprës vjen në prag të njëvjetorit të ndarjes së tyre tragjike nga jeta.
I titulluar “Forever 20”, memoriali është vendosur në “97 Avenue”, pikërisht aty ku mijëra tifozë u mblodhën spontanisht pas tragjedisë vitin e kaluar, duke lënë lule, shalle dhe mesazhe zemërthyesa. Ky vend do të shërbejë tani si një pikë e përhershme kujtimi për komunitetin e klubit dhe familjen e dy të rinjve.
Klubi anglez e ka ngritur këtë homazh pranë tribunës kryesore të stadiumit, duke zgjedhur një vendndodhje me rëndësi të thellë emocionale. Ky ishte vendi ku, pas ndarjes nga jeta të Jotës dhe Silvës, tifozët shprehën masivisht dhimbjen dhe respektin e tyre.
Lajmi u konfirmua edhe nga vetë klubi përmes një njoftimi në rrjetet sociale, ku theksohej instalimi i memorialit në kujtim të Diogo Jotës dhe Andre Silvës, një ditë para njëvjetorit të vdekjes së tyre tragjike.
Skulptorja Emma Rodgers ka projektuar memorialin, i cili përmban një zemër në lëvizje, frymëzuar nga festimi ikonik i golave të Diogo Jotës. Nga kënde të ndryshme, skulptura zbulon numrat 20 dhe 30, duke inkorporuar gjithashtu vargje nga kënga që tifozët e “Kop”-it i këndonin rregullisht sulmuesit portugez.
Inaugurimi i memorialit përkon me njëvjetorin e aksidentit tragjik rrugor në Spanjë, ku Jota dhe vëllai i tij, Andre Silva, humbën jetën. Klubi thekson se memoriali do të jetë një simbol i qëndrueshëm i dashurisë, bashkimit dhe kujtesës, duke u ofruar tifozëve një hapësirë për ndalesë, reflektim dhe nderim.
Në një deklaratë zyrtare, Liverpool FC shprehu: “Liverpool FC ndalet sot në kujtim të Diogo Jotës dhe Andre Silvës. 3 korriku shënon njëvjetorin e aksidentit tragjik rrugor në Spanjë, ku sulmuesi i ‘Të Kuqve’ dhe vëllai i tij humbën jetën.”
Klubi vijoi: “Një memorial i ri dhe emocionues në nderim të dy vëllezërve është zbuluar në ’97 Avenue’, jashtë stadiumit, duke krijuar një hapësirë të përhershme për kujtim dhe reflektim. Fanella me numrin 20, të cilën Diogo i dashur e veshi me krenari për Liverpoolin, u tërhoq menjëherë nga klubi në të gjitha ekipet e tij. Ai do të jetë përgjithmonë numri ynë 20, djali ynë nga Portugalia.”
Memoriali përmban edhe detaje personale që nderojnë jetën e dy vëllezërve. Objekte të lëna nga tifozët pas tragjedisë janë ruajtur në dyll dhe janë vendosur brenda strukturës. Bazamenti prej guri është punuar nga gur portugez, i ardhur nga qyteti i tyre i lindjes, Gondomar. Gjithashtu, një lule bronzi dhe një kontrollues PlayStation, simbol i pasionit të Jotës për lojërat konkurruese dhe e-sports, janë pjesë e veprës.
Memoriali tashmë është i hapur për publikun dhe pritet të vizitohet nga një numër i madh tifozësh gjatë fundjavës së njëvjetorit. Ai do të mbetet një pjesë e përhershme e stadiumit “Anfield”, duke u ofruar tifozëve dhe vizitorëve një vend të veçantë për të nderuar Diogo Jotën dhe Andre Silvën për vitet që do të vijnë.