Balogun flet për herë të parë pas polemikave për kartonin e kuq
Folarin Balogun ka folur për herë të parë pas vendimit të diskutueshëm të FIFA-s për të pezulluar zbatimin e dënimit të tij, një vendim që i mundësoi sulmuesit të Shteteve të Bashkuara të Amerikës të merrte pjesë në ndeshjen e 1/8 së finales kundër Belgjikës.
Balogun ishte pjesë e skuadrës së SHBA-së në humbjen 4-1 ndaj Belgjikës, vetëm pak ditë pasi FIFA pezulloi ndalesën automatike prej një ndeshjeje, të cilën ai e kishte marrë pas kartonit të kuq në përballjen kundër Bosnjë-Hercegovinës.
FIFA u bazua në nenin 27 të Kodit Disiplinor, i cili i lejon organit qeverisës të futbollit botëror të pezullojë zbatimin e një sanksioni disiplinor të vendosur më parë.
Megjithatë, vendimi që në praktikë e anuloi kartonin e kuq të Balogunit shkaktoi reagime të forta. Federata Mbretërore Belge e Futbollit konfirmoi përmes një deklarate se ishte “e habitur” nga ky zhvillim.
Edhe UEFA reagoi ashpër, duke e akuzuar FIFA-n se kishte “kaluar vijën e kuqe”, ndërsa vendimin e cilësoi si “të pakuptueshëm dhe të pajustifikueshëm”.
Pavarësisht aktivizimit të Balogunit, SHBA-ja nuk arriti të avanconte më tej në Botëror. Belgjika dominoi dhe fitoi 4-1 falë dy golave të Charles De Ketelaere, si dhe realizimeve të Hans Vanaken dhe Romelu Lukaku.
Pas përfundimit të ndeshjes, Balogun u pyet për polemikat që shoqëronin vendimin e FIFA-s.
“Kur një vendim i tillë ndryshohet, sigurisht që do të ketë polemika”, u tha ai gazetarëve. “Për mua, nuk ishte diçka që më befasoi shumë. Por si lojtar, detyra ime është të dal në fushë dhe të fokusohem te puna ime.”
Ndërkohë, trajneri i Belgjikës, Rudi Garcia, bëri të ditur se Balogun e kishte takuar pas ndeshjes dhe theksoi se nuk kishte asgjë personale me sulmuesin e Monacos.
“Flo Balogun erdhi të fliste me mua. Më pëlqeu ky gjest. Nuk është faji i tij. Ai nuk është personi që duhet fajësuar dhe këtë ia thashë edhe vetë. E vlerësoj që erdhi të fliste me mua”, deklaroi Garcia në konferencën për media.
Në fund të ndeshjes, belgët nuk e fshehën aspak kënaqësinë për fitoren. Pasi Romelu Lukaku shënoi golin e katërt në kohën shtesë, disa lojtarë belgë festuan me një rutinë vallëzimi që u interpretua si një thumbim ndaj lëvizjes së njohur të ish-presidentit Donald Trump, i cili shpesh kërcen me ritmin e këngës “Y.M.C.A.” të Village People gjatë tubimeve të tij.
Pas vërshëllimës së fundit, edhe llogaria zyrtare e Belgjikës në rrjetet sociale, @BelRedDevils, publikoi një fotografi të Lukakut duke festuar golin, me mbishkrimin ironik: “Kthejeni edhe këtë vendim”.