FIFA planifikon dhurimin e unazave për kampionët e Botërorit 2026
Federata Ndërkombëtare e Futbollit (FIFA) po përgatitet të sjellë një risi historike në mënyrën e shpërblimit të skuadrës kampione të Kupës së Botës 2026, finalja e së cilës do të zhvillohet në stadiumin MetLife.
FIFA ka njoftuar se ekipi që do të ngrejë trofeun e Botërorit të ardhshëm do të marrë unaza të personalizuara, të numëruara dhe të krijuara posaçërisht për kampionët. Kjo traditë e re është frymëzuar nga praktikat e ligave të mëdha sportive amerikane, si NBA dhe NFL.
Sipas FIFA-s, do të krijohen gjithsej 2,026 unaza, një numër simbolik që përfaqëson vitin e këtij Botërori. Prej tyre, 30 unaza do t’u shpërndahen lojtarëve dhe stafit teknik të kombëtares fituese. 1,996 unazat e tjera do të dalin në shitje për publikun, si artikuj zyrtarë koleksionistësh, të shoqëruara me certifikata autenticiteti.
Çmimi i këtyre unazave ende nuk është bërë i ditur, por pritet të jetë i lartë, për shkak të dizajnit ekskluziv dhe karakterit të tyre koleksionues. Dizajni do të integrojë pamjen e trofeut të Kupës së Botës me elemente të identitetit të kombit fitues.
Sipas planit të organizatorëve, pas përfundimit të ndeshjes finale, kapiteni dhe trajneri i ekipit kampion do të marrin fillimisht unaza provizore, para ngritjes zyrtare të trofeut. Më pas, në një ceremoni private, secili prej 30 anëtarëve të ekipit do të shpërblehet me unazën e tij përfundimtare.