**FIFA sqaron: Gabim teknik, Paredes nuk mori karton të kuq në finalen e Kupës së Botës 2026**
Federata Ndërkombëtare e Futbollit (FIFA) ka dhënë sqarime mbi një nga incidentet më të diskutuara pas finales së Kupës së Botës 2026 mes Argjentinës dhe Spanjës, ku pati tensione dhe përplasje pas përfundimit të ndeshjes.
Fillimisht, u raportua se mesfushori argjentinas Leandro Paredes kishte marrë një karton të kuq për shkak të përfshirjes në kaosin e krijuar pas vërshëllimës përmbyllëse. Ky informacion madje u shfaq edhe në sistemin zyrtar informativ të FIFA-s, i destinuar për komentatorët.
Megjithatë, është sqaruar se nuk bëhej fjalë për anulim të kartonit të kuq nga FIFA, pasi një i tillë nuk ishte dhënë kurrë, por për një gabim teknik në sistem. Sipas gazetarit të BBC-së, Dale Johnson, të dhënat ishin futur gabimisht dhe më pas janë fshirë.
Duke cituar Johnsonin, ai tha: “Shumë burime e kanë keqinterpretuar informacionin për Leandro Paredes. Kartoni i kuq nuk është anuluar, sepse një karton i kuq nuk ka pasur fare. Ai ishte shfaqur gabimisht në sistemin informativ të FIFA-s për komentatorët dhe më pas është fshirë.”
Vlen të theksohet se Argjentina e përfundoi finalen ndaj Spanjës me 10 lojtarë, pasi Enzo Fernández u ndëshkua me dy kartonë të verdhë dhe si pasojë u përjashtua nga loja.