Ushqimet që nuk duhet të konsumohen së bashku me medikamentet: Këshilla e ekspertëve
Disa ushqime, kur konsumohen bashkë me medikamente të caktuara, mund të ndikojnë negativisht në efikasitetin e tyre ose, në rastin më të keq, të shkaktojnë efekte anësore të rrezikshme. Doktoresha Aisling Hillick, në një intervistë për revistën “Mirror”, ka shpjeguar cilat janë këto ushqime dhe pse duhet të jemi të kujdesshëm.
**Bananet**
Nëse jeni duke marrë ilaçe për rregullimin e presionit të gjakut, duhet t’i shmangni bananet. Kombinimi i tyre me këto medikamente mund të çojë në nivele të larta të kaliumit në gjak, gjë që mund të jetë e dëmshme.
**Limoni jeshil dhe Portokalli**
Kur jeni duke marrë medikamente kundër kollës, siç është dekstrometorfani, shmangni konsumimin e limonit jeshil dhe portokallit. Këto fruta mund të shkaktojnë një mbidozë të dekstrometorfanit, me efekte anësore të tilla si halucinacione apo përgjumje ekstreme.
**Alkooli**
Alkooli duhet shmangur rreptësisht nëse jeni duke marrë ilaçe për diabetin ose qetësues. Shumica e këtyre medikamenteve mbajnë një paralajmërim për të mos u kombinuar me alkoolin, pasi ai ushtron presion mbi mëlçinë, duke rritur ndjeshëm rrezikun e dëmtimit të saj.
**Kafeja**
Konsumimi i kafesë nuk rekomandohet nëse jeni duke trajtuar astmën me medikamente. Kafeina e tepërt mund të shkaktojë nervozizëm dhe shqetësim, duke ndikuar negativisht në gjendjen tuaj.
**Zarzavatet me gjethe të gjelbra**
Nëse merrni antikoagulantë (hollues gjaku), duhet të keni kujdes me zarzavatet me gjethe të gjelbra, si spinaqi apo lakra. Këto perime janë të pasura me vitaminë K, ndërsa medikamentet antikoagulante synojnë të pengojnë veprimin e vitaminës K. Konsumimi i sasive të mëdha të tyre mund të ndërhyjë në efikasitetin e ilaçeve.
**Jamballi i zi**
Jamballi i zi është veçanërisht i dëmshëm për personat që marrin medikamente për zemrën. Ai mund të ulë nivelet e kaliumit në trup, gjë e cila është e rrezikshme për pacientët kardiakë dhe mund të provokojë ritme të çrregullta kardiake.
**Qumështi**
Shmangni qumështin nëse jeni duke marrë antibiotikë. Kalciumi në qumësht mund të ndërhyjë në përthithjen e antibiotikëve nga organizmi, duke zvogëluar ndjeshëm efektivitetin e tyre.
**Grejpfruti**
Grejpfruti mund të jetë i rrezikshëm nëse merrni statina, të përdorura kryesisht për menaxhimin e kolesterolit të lartë. Ky frut pengon metabolizmin e statinave, duke çuar në rritjen e niveleve të tyre në trup dhe potencialisht në një mbidozë. Si pasojë, pacientët mund të përjetojnë dhimbje të forta muskulore.
**Salmoni i tymosur**
Pacientët që përdorin antidepresivë duhet të shmangin salmonin e tymosur. Të dyja përmbajnë tiraminë, dhe kombinimi i tyre mund të shkaktojë një rritje të ndjeshme të niveleve të këtij kimikati, gjë që mund të çojë në presion të lartë të gjakut.