**Steinmeier: Kundër etno-nacionalizmit, Gjermania ka nevojë për emigracionin**
Presidenti gjerman, Frank-Walter Steinmeier, ka paralajmëruar me forcë kundër një rikthimi të mentalitetit etno-nacionalist, duke theksuar se Gjermania ka nevojë thelbësore për emigracionin. Këto deklarata, të bëra pak para zgjedhjeve për parlamentet e landeve në Saksoni-Anhalt, Berlin dhe Meklenburg-Pomerani, shprehin një qëndrim të qartë kundër përjashtimit dhe diskriminimit të personave të emigruar në Gjermani, ose atyre me prejardhje jo-gjermane. “Gjermania u përket të gjithë atyre që jetojnë ligjërisht këtu,” theksoi ai në Berlin.
**Emigracioni: Një domosdoshmëri për Gjermaninë**
Steinmeier riafirmoi se Gjermania duhet të jetë një vend “që i thotë jo kujtdo që ushqen fantazi për izolim etnik.” Sipas tij, “Ne si vend kemi nevojë për emigracion nëse duam që vendi ynë të funksionojë.” Ai theksoi se nuk ka vend për “qytetarë të klasit të parë apo të dytë,” duke shtuar se “populli gjerman,” sipas kuptimit të Kushtetutës, “përfshin edhe gjermanët që janë integruar në këtë vend.”
**Kushtetuta nuk njeh “gjermanë biologjikë”**
Presidenti theksoi se Kushtetuta gjermane nuk njeh asnjë bashkësi popullore të bazuar në prejardhjen gjenetike të përbashkët, e as privilegje mbi bazën e shtetësisë për të ashtuquajturit “gjermanë biologjikë.” “Nuk është vetëm prejardhja e gjyshërve ajo që na bën gjermanë, e as gjaku që rrjedh në venat tona,” tha Steinmeier. “Është shtetësia, pavarësisht nëse është fituar përmes lindjes apo natyralizimit. Është gjuha e përbashkët. Është dëshira për të bashkëjetuar në paqe dhe liri. Është Kushtetuta që përbën themelin e vendit ku jetojmë.”
**Adresimi i hapur i problemeve**
Ndonëse Presidenti Steinmeier nuk e përmendi me emër partinë Alternativa për Gjermaninë (AfD), deklaratat e tij mund të interpretohen si një kritikë e drejtpërdrejtë ndaj qëndrimit antimigrator të kësaj partie. Ai theksoi se Gjermania nuk duhet të humbasë vetveten duke ndjekur parimin “ne kundër atyre.” Megjithatë, pranoi domosdoshmërinë për të trajtuar hapur problemet, për t’u drejtuar frikërave dhe për të kërkuar zgjidhje “me mendje të hapur dhe qëndrim të qartë.”
Steinmeier përsëriti se Gjermania ka nevojë për migracionin që të funksionojë siç duhet. “Kjo vlen për spitalet, shtëpitë e të moshuarve dhe institucionet e kujdesit shëndetësor, dhe tashmë vlen edhe për fusha shumë të mëdha të ekonomisë private,” shpjegoi ai.
**Migracioni kërkon përpjekje, por sjell edhe mundësi**
Presidenti gjerman pranoi se migracioni kërkon përpjekje dhe energji, si nga qytetarët vendas prej kohësh, ashtu edhe nga bashkitë. Por, nga ana tjetër, sipas Steinmeier, migracioni u sjell atyre edhe forcë dhe mundësi të reja, si për shembull kur kompanitë vendore gjejnë punëtorë të kualifikuar dhe profesionistë, ose kur vijnë inxhinierë për të cilët Gjermania ka nevojë të madhe.