**Përfundon Shqyrtimi Gjyqësor për Glauk Konjufcën, Aktgjykimi Shpallet Më 28 Gusht**
**Prishtinë** – Shqyrtimi gjyqësor ndaj Glauk Konjufcës, ministër në detyrë i Punëve të Jashtme, lidhur me rastin e hedhjes së gazit lotsjellës në Kuvendin e Kosovës, ka përfunduar. Aktgjykimi pritet të shpallet më 28 gusht, në orën 13:00. Prokuroria ka kërkuar dënimin e Konjufcës, ndërsa mbrojtja ka kërkuar lirimin e tij, raporton Ekonomia Online.
Në fjalën përfundimtare, Prokuroria kërkoi që Konjufca të shpallet fajtor, duke theksuar se gjatë procesit janë paraqitur prova materiale dhe dëshmi personale që vërtetojnë kryerjen e veprës penale. Prokurori argumentoi se ishte dëshmuar se në ditën kritike ishte hedhur gaz lotsjellës në sallën e Kryesisë së Kuvendit dhe se i akuzuari, Glauk Konjufca, ishte i pranishëm. Ky fakt, sipas tij, konfirmohet edhe nga dëshmitë e Adem Grabovcit, Ismet Beqirit, Sabri Hamitit, Sllobodan Petroviqit dhe Valdete Bajramit, të cilët pohuan se gazi lotsjellës ishte hedhur dhe se mbledhja ishte ndërprerë. Prokuroria shtoi se vendi i ngjarjes dhe një bombolë e zbrazët e gjetur aty, pranë Konjufcës, vërtetoheshin edhe përmes një foto-albumi dhe raportit të vendit të ngjarjes. Më tej, theksoi se Konjufca e kishte pranuar përdorimin e gazit lotsjellës gjatë marrjes në pyetje nga policia dhe prokuroria. Prokurori përfundoi duke theksuar se nuk ekziston asnjë rrethanë lehtësuese për të pandehurin.
Në anën tjetër, avokatja e Konjufcës, Arbnora Zeqiri, kërkoi lirimin e tij, duke theksuar se nuk ishte provuar se i mbrojturi i saj kishte kryer veprën penale. Zeqiri argumentoi se as provat materiale e as dëshmitë e dëshmitarëve nuk e vërtetonin akuzën. Ajo theksoi se asnjë dëshmitar nuk e kishte përmendur Konjufcën si personin që hodhi gazin lotsjellës. Avokatja vuri në dyshim edhe statusin e provës të fotove dhe raporteve të këqyrjes së vendit të ngjarjes, duke theksuar se vetë raporti përmend “dyshimin” për bombolën dhe se Prokuroria nuk po arrinte të mbronte aktakuzën ligjërisht. Ajo përfundoi duke kërkuar nga gjykata nxjerrjen e një aktgjykimi lirues.
Vetë Konjufca, në fjalën e tij përfundimtare, deklaroi se ndihet i pafajshëm, duke u mbrojtur “në heshtje”.
Kryetarja e trupit gjykues, Edita Qanta, konfirmoi përfundimin e shqyrtimit dhe caktoi shpalljen e aktgjykimit për 28 gusht, ora 13:00.
Ky rast ka një histori të gjatë gjyqësore. Më 26 shkurt 2024, Gjykata Themelore në Prishtinë kishte shpallur aktgjykim lirues ndaj Konjufcës, me arsyetimin se nuk ishte provuar vepra penale “Përdorimi i armës apo mjetit të rrezikshëm”. Për akuzën tjetër, “Pengimi i personit zyrtar në kryerjen e detyrës zyrtare”, akuza ishte refuzuar për shkak të parashkrimit. Mirëpo, Gjykata e Apelit e prishi këtë vendim dhe e ktheu rastin në rigjykim.
Aktakuza ndaj Glauk Konjufcës ishte ngritur nga Prokuroria Themelore në Prishtinë më 3 shkurt 2017. Ajo e ngarkonte Konjufcën, në atë kohë deputet, se më 10 gusht 2016, gjatë një mbledhjeje të Kuvendit, kishte hedhur gaz lotsjellës në sallë. Si pasojë, pjesëmarrësit ishin detyruar të braktisnin sallën për shkak të tymit.