Studenti Humolli: Asnjë Gjykatë Nuk Ndryshon Perceptimin e Rinisë Për Çlirimtarët
Studenti Donart Humolli ka deklaruar se rinia e Kosovës nuk do të ndryshojë perceptimin e saj për ish-luftëtarët e Ushtrisë Çlirimtare të Kosovës (UÇK), pavarësisht vendimeve gjyqësore. Këtë deklaratë, Humolli e bëri gjatë marshit të studentëve të Universitetit të Prishtinës kundër vendimit të Gjykatës Speciale në Hagë ndaj ish-krerëve të UÇK-së, raporton Ekonomia Online.
Ai theksoi se rinia e sheh gjykimin ndaj tyre si të padrejtë, pasi ata janë figurat që mundësuan lirinë e vendit. Humolli shtoi se brezat e rinj, ndonëse nuk e kanë përjetuar tmerrin e luftës, janë thellësisht të vetëdijshëm se liria aktuale nuk do të ishte e mundur pa sakrificën e UÇK-së.
Humolli theksoi gjithashtu rolin kyç të mbështetjes së aleatëve ndërkombëtarë, në veçanti Shteteve të Bashkuara të Amerikës, në arritjen e lirisë. Ai shprehu besimin se Perëndimi, ashtu siç u bë aleat i UÇK-së në vitet ’98-’99 për të sjellë lirinë, do të mbetet aleat edhe sot, duke mos lejuar padrejtësi ndaj luftëtarëve të saj. “Studentët dhe rinia e Kosovës qëndrojnë të bashkuar me besimin e patundur tek Perëndimi,” u shpreh ai.
Sipas Humollit, rinia e Kosovës sot gëzon lirinë në një shtet të pavarur, demokratik dhe multietnik, ku respektohen të gjitha minoritetet. Ai argumentoi se një popull që ka përjetuar vetë shtypjen dhe padrejtësinë për vite me radhë, e kupton mirë se çfarë do të thotë ta përjetosh atë, prandaj nuk mund të pranojë trajtim të tillë ndaj atyre që mundësuan këtë liri.
Në fund, Humolli iu drejtua si atyre që aktualisht ndodhen në Hagë, ashtu edhe gjithë botës demokratike, me mesazhin e prerë: “Nuk ka gjykatë e as vendim që do ta ndryshojë mënyrën se si rinia e Kosovës i sheh çlirimtarët tanë.”