**Policia e Manchesterit sekuestron gjashtë makina luksoze pas vozitjes së rrezikshme në autostradë**
Pesë makina luksoze Lamborghini dhe një Mercedes G-Class janë sekuestruar nga policia në afërsi të Manchesterit, Britani e Madhe. Drejtuesit e tyre dyshohet se kanë kryer vozitje të rrezikshme në autostradë, duke ngadalësuar në mënyrë drastike deri në vetëm 27 kilometra në orë.
Policia e Greater Manchester (GM) njoftoi se kishte marrë raportime për një grup automjetesh luksoze që lëviznin në autostradën M66. Sipas njoftimeve, ata udhëtonin me shpejtësi të lartë, ndërronin korsi në mënyrë të rrezikshme, rrotullonin gomat dhe më pas ngadalësonin deri në rreth 27 km/h (17 milje në orë).
Pas marrjes së raportimeve, forcat e rendit e identifikuan kolonën në autostradën M62. Dy prej makinave Lamborghini u ndaluan teksa po largoheshin nga autostrada, ndërsa policia përdori taktika të specializuara për të ndaluar automjetet e tjera në Rochdale.
Në fund të operacionit, policia sekuestroi pesë makina Lamborghini dhe një Mercedes G-Class. Sekuestrimi u krye bazuar në nenin 59 të Aktit të Reformës Policore të vitit 2002, dhe ndaj drejtuesve të automjeteve janë nisur procedura ligjore për shkelje të shumta të rregullave të trafikut.
Inspektori Danny Kabal deklaroi se policia nuk do të tolerojë asnjëherë vozitjen e pakujdesshme, antisociale apo të rrezikshme. Ai theksoi se kushdo që i përdor rrugët publike si pista garash rrezikon sekuestrimin e automjetit dhe përballjen me pasoja ligjore.
Ndryshimet e fundit legjislative në Britaninë e Madhe u japin autoriteteve kompetencën të sekuestrojnë automjete në rrethana të caktuara, pa qenë e detyrueshme dhënia paraprake e një paralajmërimi drejtuesit.