Rusia vrau katër persona në sulmet ajrore gjatë natës në Ukrainë, thanë zyrtarët ukrainas të martën, vetëm disa orë para takimit të presidentit ukrainas Volodymyr Zelenskiy me presidentin amerikan Donald Trump në Kombet e Bashkuara.
Sulmet u kryen në zonat industriale të Ukrainës, ndërsa Moska ka intensifikuar bombardimet gjatë muajve të fundit. Objektivat e goditura kanë përfshirë biznese, porte, qendra logjistike, infrastrukturë energjetike dhe objekte të tjera ekonomike, shkruan Reuters, transmeton Dukagjini.
“Rusia synon qëllimisht bizneset, fermat, depot, hekurudhat, objektet energjetike dhe ndërtesat e banimit”, tha kryeministri ukrainas Sergii Koretskyi në Telegram.
Ndërkohë, edhe Ukraina ka shtuar sulmet me rreze të gjatë ndaj objektivave në territorin rus, duke synuar rafineritë e naftës dhe kompani të mëdha, në përpjekje për të dëmtuar kapacitetet e Moskës për zhvillimin e luftës.
Ushtria ukrainase njoftoi të martën se kishte goditur një rafineri nafte në qytetin Ufa, më shumë se 1,300 kilometra larg kufirit me Ukrainën. Sipas saj, një tjetër rafineri, ajo e Kuibyshevit në rajonin e Samarës, ishte gjithashtu objektiv i sulmit.
Guvernatori i rajonit të Samarës tha se dronët ukrainas goditën objektiva civile, duke vrarë një person dhe plagosur katër të tjerë. Të dyja palët mohojnë se synojnë civilët.
Presidenti amerikan Donald Trump kishte deklaruar javën e kaluar se Rusia dhe Ukraina kishin rënë dakord të mos sulmonin objektet energjetike. Megjithatë, çdo shenjë e një armëpushimi të tillë u zbeh pasi Rusia goditi pika karburanti në Kiev të nesërmen, ndërsa Ukraina sulmoi një rafineri ruse të naftës.