**Faruk Mujka dhe Hysen Muzliukaj sërish të pafajshëm për akuzat e korrupsionit**
**Prishtinë** – Faruk Mujka, kryeshef ekzekutiv i Ndërmarrjes Hidro-Ekonomike “Ibër-Lepenc”, dhe Hysen Muzliukaj, ish-drejtor për Gjeodezi në Mitrovicë, u deklaruan sërish të pafajshëm për akuzat e korrupsionit në Gjykatën Themelore në Prishtinë. Seanca e së hënës vazhdon me fjalët hyrëse të palëve.
Të dy të akuzuarit e kishin mohuar fajësinë edhe gjatë seancës fillestare, e mbajtur më 20 tetor 2025.
**Aktakuza e Prokurorisë Speciale**
Aktakuza, e ngritur nga Prokuroria Speciale e Republikës së Kosovës (PSRK) më 9 shtator 2025, i ngarkon Mujkën dhe Muzliukajn me keqpërdorim të detyrës zyrtare. Akuza specifike ka të bëjë me një rast të këmbimit të pronës së ish-Bankosit me pronë private, gjatë kohës kur Mujka shërbente si nënkryetar i Komunës së Mitrovicës dhe Muzliukaj si drejtor për Gjeodezi, Kadastër dhe Pronë në po atë komunë. Përveç kësaj, Mujka akuzohet edhe për mosraportim apo raportim të rremë të pasurisë, pasi dyshohet se nuk deklaroi 60.050 euro të gjetura dhe sekuestruara në shtëpinë e tij, në cilësinë e kryeshefit ekzekutiv të “Ibër-Lepencit”. Këto detaje janë raportuar nga “Betimi për Drejtësi”.
**Keqpërdorimi i detyrës zyrtare – Çështja e pronës**
Sipas aktakuzës, Mujka dhe Muzliukaj, duke shfrytëzuar pozitat e tyre zyrtare, dyshohet se kanë tejkaluar kompetencat me qëllim përfitimi për persona të tretë dhe në dëm të pronës publike. Ata kishin propozuar Kuvendit Komunal të Mitrovicës, më 25 prill 2021, një vendim për këmbimin e një prone prej 139 metra katrorë, pjesë e ndërtesës së ish-Bankosit, me një pronë private prej 102 metra katrorë, në pronësi të personit fizik Besarta Isufi.
Aktakuza thekson se dy zyrtarët ishin në dijeni se prona e ish-Bankosit nuk ishte pronë komunale dhe se për të ekzistonte një proces gjyqësor i iniciuar nga Agjencia Kosovare e Privatizimit (AKP) dhe Ndërmarrja Shoqërore “Jugobanka”. Për më tepër, ata kishin vepruar në kundërshtim me Ligjin për dhënien në shfrytëzim dhe këmbim të pronës së paluajtshme të Komunës dhe Rregullores përkatëse, të cilat ndalojnë dhënien në shfrytëzim dhe këmbimin e pronës publike me pronë private.
Këto veprime, sipas akuzës, i kanë shkaktuar AKP-së një dëm të konsiderueshëm, në vlerën e 125.100 eurosh. Për këtë veprim, Mujka dhe Muzliukaj akuzohen për ‘Keqpërdorim i pozitës apo autoritetit zyrtar’, sipas nenit 414, paragrafi 2, lidhur me paragrafin 1 dhe nenin 31 të Kodit Penal të Republikës së Kosovës (KPRK).
**Mosraportimi i pasurisë nga Faruk Mujka**
Në pikën e dytë të aktakuzës, Faruk Mujka akuzohet se, në cilësinë e kryeshefit ekzekutiv të “Ibër-Lepencit”, nuk i kishte deklaruar 60.050 eurot që iu gjetën dhe sekuestruan në shtëpi më 15 korrik 2023. Ai ishte i detyruar ligjërisht të deklaronte pasurinë, përfshirë shumat kesh, por nuk e kishte bërë këtë në formularin përkatës të Agjencisë për Parandalimin e Korrupsionit. Për këtë veprim, Mujka ngarkohet me veprën penale ‘Mosraportim ose raportim i rremë i pasurisë, i të ardhurave, i dhuratave, i dobisë materiale ose i detyrimeve financiare’, sipas nenit 430, paragrafi 2 i KPRK-së.