**Komuna e Pejës publikon sqarimin e QPS-së pas raportit të Inspektoratit për rastin e Arlinda Zekajt**
Komuna e Pejës ka bërë publike sot sqarimin zyrtar të Qendrës për Punë Sociale (QPS) lidhur me raportin e Inspektimit të Jashtëzakonshëm. Ky inspektim u realizua pas rastit tragjik të vrasjes së Arlinda Zekajt, ngjarje e ndodhur më 25 tetor 2026.
Qendra për Punë Sociale në Pejë (QPS), pas shqyrtimit të Raportit të Inspektimit të Jashtëzakonshëm, të kryer nga Divizioni për Inspektimin e Shërbimeve Sociale dhe Familjare (në kuadër të Ministrisë për Punë, Familje dhe Vlerat e Luftës Çlirimtare), ka ndjerë nevojën të informojë opinionin publik. Sqarimi detajon angazhimin institucional, veprimet profesionale të ndërmarra dhe rekomandimet e evidentuara në këtë raport, që lidhet me trajtimin e rastit të rëndë në Komunën e Pejës.
**Angazhimi dhe veprimet profesionale të QPS-së**
Raporti i Inspektimit dokumenton një sërë veprimesh dhe ndërhyrjesh profesionale të ndërmarra nga QPS Pejë gjatë trajtimit të rastit. Punonjësit socialë dhe profesionistët përgjegjës kanë vepruar në kuadër të mandatit dhe kompetencave ligjore, duke u përballur me rrethana komplekse dhe tejet të ndjeshme familjare e sociale.
Ndër veprimet kryesore të ndërmarra nga QPS Pejë veçohen:
1. **Ndërhyrja fillestare dhe gatishmëria 24-orëshe:** QPS Pejë reagoi ndaj kërkesës së Stacionit Policor në Pejë, duke angazhuar punonjësin social. Gjatë ndërhyrjes fillestare është realizuar bashkëbisedimi me fëmijën, janë vlerësuar rrethanat familjare dhe është marrë parasysh mosha, pjekuria dhe vullneti i tij.
2. **Vlerësimet profesionale dhe vizitat në terren:** Janë realizuar vizita në terren në vendbanimet e palëve, vlerësime të gjendjes socio-ekonomike, bashkëbisedime me prindërit dhe familjarët, si dhe mbledhja e informacioneve relevante.
3. **Bashkëpunimi me institucionet arsimore dhe shëndetësore:** QPS ka kërkuar dhe siguruar raporte nga shkolla “The Cambridge School” dhe Qendra e Shëndetit Mendor në Pejë, të cilat kanë shërbyer si bazë profesionale për vlerësimin e gjendjes emocionale dhe psikologjike të fëmijës.
4. **Respektimi i interesit dhe vullnetit të fëmijës:** Është respektuar e drejta e fëmijës për t’u dëgjuar dhe për të shprehur pikëpamjet e tij. QPS ka marrë parasysh vlerësimet e profesionistëve dhe gjendjen emocionale të fëmijës, duke rekomanduar përgatitje graduale psikologjike.
5. **Përfaqësimi profesional në procedurat gjyqësore:** QPS Pejë ka marrë pjesë në procedurat pranë Gjykatës Themelore në Pejë, duke dorëzuar raporte profesionale dhe duke paraqitur vlerësimet e Organit të Kujdestarisë.
6. **Reagimi emergjent pas ngjarjes tragjike të datës 25.10.2026:** Pas ngjarjes tragjike, kur fëmija mbeti pa kujdes prindëror, QPS Pejë ndërmori veprime urgjente për sigurimin e mbrojtjes dhe përkujdesjes së tij, në bashkëpunim me Prokurorinë, Policinë e Kosovës dhe institucionet përkatëse. Në këtë kuadër, u sigurua edhe caktimi i kujdestarit ligjor.
7. **Vazhdimësia e mbikëqyrjes dhe mbështetjes profesionale:** Edhe pas vendosjes së fëmijës në një mjedis të sigurt, QPS ka vazhduar të përcjellë gjendjen shëndetësore, emocionale dhe psikologjike të tij, duke kërkuar raporte të rregullta nga strehimorja dhe duke bashkëpunuar me profesionistët për planifikimin individual të kujdesit.
Këto veprime dëshmojnë angazhimin e vazhdueshëm të profesionistëve të QPS-së në përmbushjen e përgjegjësive institucionale për mbrojtjen e fëmijës.
**Gjetjet e Inspektoratit dhe masat për përmirësim**
Krahas evidentimit të veprimeve profesionale të ndërmarra, Raporti i Inspektimit identifikon edhe çështje që kërkojnë përmirësim në aspektin administrativ, organizativ dhe procedural të funksionimit të Qendrës për Punë Sociale.
Ndër çështjet e evidentuara përfshihen:
* Plotësimi dhe përdorimi i formularëve standardë për menaxhimin dhe dokumentimin e rasteve.
* Respektimi i afateve për dorëzimin e raporteve dhe dokumentacionit në institucionet gjyqësore.
* Përmirësimi i mekanizmave të monitorimit dhe mbikëqyrjes së vazhdueshme të rasteve.
* Forcimi i kapaciteteve profesionale dhe njerëzore në raport me numrin e rasteve dhe territorin që mbulon QPS Pejë.
* Qartësimi i kompetencave dhe përgjegjësive institucionale ndërmjet Qendrës për Punë Sociale dhe Drejtorisë për Mirëqenie Sociale.
Qendra për Punë Sociale në Pejë thekson se i trajton me seriozitet të gjitha gjetjet dhe rekomandimet e Inspektoratit dhe do të ndërmarrë veprimet e nevojshme për zbatimin e tyre, me qëllim avancimin e procedurave të punës, forcimin e kapaciteteve profesionale dhe ngritjen e cilësisë së shërbimeve sociale. Këto masa shërbejnë si bazë për avancimin e mëtejshëm të punës institucionale.
**Qëndrimi dhe përkushtimi institucional**
Qendra për Punë Sociale në Pejë konsideron se vlerësimi i punës së institucionit dhe trajtimi i rekomandimeve të Inspektoratit duhet të bëhen në mënyrë objektive, profesionale dhe në përputhje me dokumentacionin zyrtar dhe rrethanat konkrete të rastit. Është e rëndësishme që raporti të trajtohet në tërësinë e tij, duke marrë parasysh si veprimet profesionale të dokumentuara, ashtu edhe çështjet që kërkojnë përmirësim institucional.
QPS Pejë mbetet e përkushtuar në përmbushjen e mandatit të saj ligjor, në mbrojtjen e kategorive të cenueshme të shoqërisë dhe në ofrimin e shërbimeve profesionale, me përgjegjësi të plotë ndaj qytetarëve dhe institucioneve kompetente. Profesionalizmi, përgjegjësia, ligjshmëria dhe interesi më i mirë i fëmijës mbeten parimet themelore të punës së Qendrës për Punë Sociale – Pejë.