Publikohet lista e emrave më të njohur për foshnjat në SHBA: Liam dhe Olivia kryesojnë për të shtatin vit radhazi.
Lista vjetore e emrave më të njohur për foshnjat në Shtetet e Bashkuara është publikuar, duke konfirmuar dominimin e Liam dhe Olivia për të shtatin vit radhazi.
Pas Liam-it, pesëshen e parë për djem e plotësojnë Noah, Oliver, Theodore dhe Henry. Dhjetëshen e parë e pasurojnë James, Elijah, Mateo, William dhe Lucas.
Ndërsa te vajzat, Olivia mban vendin e parë, e ndjekur nga Charlotte, e cila është ngjitur në pozicionin e dytë. Emma, Amelia dhe Sophia renditen gjithashtu në pesëshen kryesore. Mia, Isabella, Evelyn, Sofia dhe Eliana kompletojnë dhjetëshen më të preferuar.
Kjo renditje bazohet në të dhënat e rreth 3.6 milionë foshnjave të lindura në SHBA gjatë vitit të kaluar. Emrat Olivia dhe Liam vazhdojnë të konsiderohen popullorë për shkak të tingullit të butë, thjeshtësisë, elegancës dhe një karakteri klasik, por njëkohësisht modern.
Administrata Amerikane e Sigurimeve Shoqërore (SSA), e cila publikon çdo vit këtë listë, nisi përpilimin e këtyre renditjeve në vitin 1997, duke marrë të dhënat nga aplikimet për kartat e sigurimeve shoqërore të dorëzuara pas lindjes së fëmijëve.
Institucioni thekson se Charlotte i dha fund periudhës gjashtëvjeçare të Emma-s në vendin e dytë për vajza. Ndërkohë, emri Ava, i cili për vite me radhë ishte pjesë e dhjetëshes kryesore, ka dalë nga lista dhe është zëvendësuar nga Eliana, e cila u rendit në pozicionin e dhjetë. Për djemtë, katër emrat kryesorë – Liam, Noah, Oliver dhe Theodore – ruajtën pozicionet e tyre pa ndryshim.
Përtej dhjetëshes kryesore, të dhënat zbulojnë edhe prirje të reja në zgjedhjen e emrave. Prindërit po shfaqin interes në rritje për emra me drejtshkrime unike, ndikime shumëkulturore dhe një tingull modern.
Te djemtë, emri Kasai shënoi rritjen më të madhe, duke u ngjitur me 1,108 vende dhe duke hyrë për herë të parë në listën e 1,000 emrave më të përdorur. Me rrënjë japoneze dhe suahili, Kasai shpesh lidhet me kuptimin “zjarr”, duke i dhënë një ndjesi të fortë dhe energjike. Një tjetër emër japonez në rritje është Akari, që shpesh lidhet me kuptimet “dritë” ose “shkëlqim”. Pas tij renditen Eziah, një variant modern i frymëzuar nga emrat biblikë, si dhe Jasai dhe Neithan.
Për vajzat, emri Klarity kryeson listën e atyre me rritjen më të shpejtë. Ky variant modern i fjalës angleze “clarity” lidhet me idetë e qartësisë, dritës dhe transparencës, duke reflektuar trendin e emrave me kuptim simbolik dhe drejtshkrim kreativ. Në pesëshen e emrave femërorë me rritjen më të shpejtë bëjnë pjesë edhe Rynlee, Ailanny, Naylani dhe Madisson, duke theksuar prirjen e prindërve për emra melodikë dhe forma alternative të emrave tradicionalë.
Nga ana tjetër, disa emra po humbasin ndjeshëm popullaritetin. Sipas analizave të BabyCenter, te vajzat, emra si Charleigh, McKinley, Prisha, Ezra, Sasha, Mia, Kenna, Kori, Dior dhe Shaikha kanë shënuar rënie, me Charleigh dhe Shaikha ndër më të prekurit. Edhe te djemtë vërehen rënie të ndjeshme. Emra si Kylian, Atharv, Enoch, Crue, Huxley, Salman, Camilo, Advik, Emmitt dhe Garrett kanë humbur terren. Vihet re se emrat që përfundojnë me “-y” po humbasin popullaritet më shpejt, ndërsa Huxley ka rënë me 296 vende. Për vajzat, variantet me drejtshkrim të veçantë të emrave të njohur, si Maddison dhe Alivia, po humbasin gjithashtu popullaritet. Charleigh ka shënuar rënien më të madhe, duke zbritur me 421 vende.
Ndërkohë, faqja e specializuar Nameberry ka parashikuar trendet kryesore për vitin 2026, ku pritet të rritet interesi për emra të frymëzuar nga qytetërimet e lashta. Për vajzat, emra si Olympia, Adhara dhe Marcella pritet të fitojnë më shumë vëmendje, ndërsa për djemtë mund të ngjiten në renditje Ramses, Isidore dhe Linus.