Një aktivist francez për të drejtat e kafshëve ka tërhequr vëmendjen pasi pagoi 300 euro për një karavidhe të gjallë në një restorant, jo për ta konsumuar, por për ta kthyer në det.
Ngjarja ndodhi në Roquebrune-Cap-Martin, në juglindje të Francës, ndërsa historia është raportuar nga gazeta franceze “Le Parisien”.
Stéphane Lamar, president i një organizate për mbrojtjen e kafshëve të themeluar prej tij në vitin 2000, po festonte ditëlindjen në një restorant së bashku me një mikeshë kur ndodhi episodi i pazakontë.
Gjatë vaktit, një kameriere iu afrua tavolinës për t’u prezantuar klientëve kapjen e ditës, ku përfshiheshin peshq dhe fruta deti. Mes tyre ndodhej edhe një karavidhe i gjallë.
Lamar tha se ajo që pa i ishte dukur si një “skenë tmerri” dhe vendosi menjëherë të ndërhynte.
“Nuk mund ta duroja atë që po shihja”, deklaroi ai për France 3.
Pagoi çmimin e restorantit dhe e mori me vete
Aktivisti, i cili është vegjetarian, sqaroi se nuk kërkon që restorantet të ndalojnë së shërbyeri mish apo peshk.
Megjithatë, ai mendon se frutat e detit duhet të trajtohen në mënyrë që të reduktohet vuajtja e tyre para gatimit, përfshirë mpirjen përpara se të vendosen në ujë të valë.
Në vend që të debatonte me stafin e restorantit, Lamar vendosi të paguante 300 eurot e kërkuara për karavidhen.
Më pas e mori me vete, shkoi drejt bregdetit dhe e lëshoi në ujërat e Mesdheut.
“Të paktën i dhashë një mundësi të dytë”
Lamar pranoi se nuk mund ta dijë nëse karavidhja mbijetoi pasi u kthye në det.
“Të paktën i dhashë një mundësi të dytë për të jetuar”, tha ai.
Ky nuk është veprimi i parë i këtij lloji nga aktivisti francez.
Në vitin 2024, Lamar kishte blerë edhe tre karavidhe të gjalla që mbaheshin në vitrinën e një restoranti në Menton, duke paguar për to me të njëjtin qëllim: t’i lironte në det.
Veprimet e tij kanë tërhequr vëmendje për mënyrën e pazakontë me të cilën ai përpiqet të sensibilizojë publikun për trajtimin e kafshëve dhe, veçanërisht, të gjallesave të detit në industrinë ushqimore.